Kənd Təsərrüfatı Nazirliyinin Aqrar İnnovasiya Mərkəzi və rayon icra hakimiyyətlərinin birgə təşkilatçılığı ilə bölgələrdə kənd təsərrüfatı və yerli məhsulların təşviqinə həsr olunmuş məhsul festivalları uğurla davam etdirilir.
Nazirlikdən AZƏRTAC-a bildirilib ki, bu təşəbbüs çərçivəsində növbəti tədbirlər – Aqrar Biznes Festivalı və Şaftalı Festivalı Xaçmaz rayonunda baş tutub.
Festival Kənd Təsərrüfatı Nazirliyinin Aqrar İnnovasiya Mərkəzi, Xaçmaz Rayon İcra Hakimiyyəti və “Food City Agrocomplex”in birgə təşkilatçılığı ilə keçirilib.
Festivalların keçirilməsində əsas məqsəd regionun kənd təsərrüfatı potensialını daha geniş ictimaiyyətə tanıtmaq, yerli fermerləri və aqrar sahədə fəaliyyət göstərən sahibkarları dəstəkləmək, eyni zamanda bölgənin aqroturizm imkanlarının inkişafına töhfə verməkdir.
Festival çərçivəsində Xaçmaz rayonundan olan fermerlər və təsərrüfat sahibləri öz məhsullarını - xüsusilə də yerli şaftalı sortlarını sərgiləyiblər. Sərgidə kənd təsərrüfatı məhsulları ilə yanaşı, texnoloji yeniliklər, innovativ aqrar xidmətlər və müxtəlif yerli brendlər də təqdim olunub.
Festival iştirakçıları arasında yerli istehsalçılar, aqrar şirkətlər, Kənd Təsərrüfatı Nazirliyinin tabeliyində olan qurumların nümayəndələri, eləcə də digər dövlət qurumlarının əməkdaşları yer alıblar.
Tədbirin açılış mərasimində çıxış edən Xaçmaz Rayon İcra Hakimiyyətinin başçısı Elnur Rzayev Prezident İlham Əliyevin rəhbərliyi ilə rayonda aqrar sahənin inkişafı istiqamətində həyata keçirilən tədbirlərdən danışıb. O, Xaçmaz rayonunun 95 illik yubileyinə təsadüf edən festivalın əhəmiyyətini yüksək qiymətləndirib.
Aqrar İnnovasiya Mərkəzinin direktoru Anar Cəfərov çıxışında bildirib ki, festivallar aqrar sahədə müasir yanaşmaların təşviqinə, təcrübə mübadiləsinə və regionların sosial-iqtisadi inkişafına mühüm töhfə verir: “Regionlarda təşkil edilən festivallar fermerlər üçün praktiki biliklərin əldə olunması, müasir aqrar texnologiyalarla tanışlıq və aqrar sahədə fəaliyyət göstərən qurumlarla daha sıx əlaqələrin qurulması baxımından da mühüm əhəmiyyət daşıyır. Qeyd edilib ki, bu platformalar gənclərin kənd təsərrüfatına marağını artırmaqla yanaşı, aqrar innovasiya və texnologiyaların regionlara inteqrasiyasına xidmət edir”.
“Food City Agrocomplex”in baş icraçı direktoru Anar Ağayev qeyd edib ki, yerli istehsalın inkişafı dövlətin aqrar sahəyə göstərdiyi davamlı dəstək sayəsində sürətlənir: “Dövlət qurumları ilə birgə reallaşdırılan layihələr yüksək texnologiyaların tətbiqinə və ixrac bazarlarının genişləndirilməsinə xidmət edir. Bu təcrübə yerli məhsul istehsalına marağı artırmaqla yanaşı, fermer və sahibkarların bazar mövqeyini gücləndirir”.
Aqrar Tədarük və Təchizat ASC-nin İdarə Heyətinin sədri Elgün Məhəmmədəlizadə, Azərbaycan Meyvə-Tərəvəz İstehsalçıları və İxracatçıları Assosiasiyasının sədr müavini Jalə Əmirbəyova çıxışlarında bu kimi tədbirlərin yerli məhsul istehsalçılarına dəstək baxımından mühüm əhəmiyyət kəsb etdiyini vurğulayıb, praktik təcrübələrin bölüşülməsi baxımından yeni platforma rolu oynadığını vurğulayıblar.
Festival çərçivəsində “Aqrar sahədə dövlətin dəstək mexanizmləri” mövzusunda panel müzakirəsi keçirilib. Müzakirədə Aqrar Kredit və İnkişaf Agentliyi, Aqrar Sığorta Fondu, Biznesin İnkişafı Fondu, Qida Təhlükəsizliyi Agentliyi, Dövlət Məşğulluq Agentliyi, eləcə də banklar və bank olmayan kredit təşkilatlarının nümayəndələri iştirak ediblər. Panel zamanı subsidiyalar, güzəştli kreditlər, aqrar sığorta mexanizmləri, sertifikatlaşdırma məsələləri və məşğulluq proqramları barədə iştirakçılara ətraflı məlumat verilib, fermerlərin sualları cavablandırılıb.
Festival gün ərzində maraqlı və rəngarəng proqramla davam edib. Yerli sakinlər, turistlər və ailələr üçün təşkil olunan mədəni-əyləncəli proqramlar, folklor çıxışları, kulinariya təqdimatları və dequstasiya guşələri tədbirə xüsusi rəng qatıb.
