Mayın 18-də BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində Latın Amerikası və Karib hövzəsi ölkələrinin Mənzil və Şəhərsalma üzrə Nazirlər və Yüksək Səviyyəli Orqanlar Forumunun (MINURVI) rəsmi sessiyası baş tutub.
AZƏRTAC xəbər verir ki, tədbir davamlı şəhər inkişafı, mənzil siyasəti və regional əməkdaşlıq məsələlərini müzakirə etmək üçün əsas platformalardan birinə çevrilib.
Sessiya hazırda MINURVI-yə sədrlik edən Uruqvayın təşəbbüsü ilə təşkil olunub. Müzakirələrdə hökumətlərin, beynəlxalq təşkilatların nümayəndələri, şəhərsalma və davamlı inkişaf üzrə ekspertlər iştirak ediblər.
Tədbir iştirakçıları vurğulayıblar ki, sürətli urbanizasiya, iqlim dəyişikliyi və sosial bərabərsizliyin artması region ölkələrindən şəhər inkişafına yeni yanaşmalar hazırlamağı tələb edir. Xüsusilə əlverişli mənzil təminatı, şəhər infrastrukturunun modernləşdirilməsi, yaşayış yerlərinin iqlim risklərinə uyğunlaşdırılması və şəhər mühitinin keyfiyyətinin yaxşılaşdırılması məsələlərinə diqqət yetirilib.
Uruqvayın Mənzil Tikintisi və Ərazi Planlaşdırma Nazirliyinin ərazi planlaşdırılması üzrə milli direktoru Paola Floria qeyd edib ki, bu gün region dövlətləri qarşısında təkcə əhalini mənzil ilə təmin etmək deyil, həm də davamlı, inklüziv və təhlükəsiz şəhərlər yaratmaq kimi vəzifə durub. “Gələcəyin şəhərləri insanların ətrafında qurulmalıdır. Davamlılıq sosial ədalətlə birləşdirilməli, dövlət siyasəti isə insanların gəlirindən və yaşadığı yerdən asılı olmayaraq bütün sakinlərin maraqlarını nəzərə alan məkanlar formalaşdırmalıdır”, - deyə direktor vurğulayıb.
Onun sözlərinə görə, MINURVI çərçivəsində əməkdaşlıq Latın Amerikası və Karib hövzəsi ölkələrinə uğurlu təcrübələri bölüşməyə və ortaq problemlərin həlli üçün birgə çıxış yolları tapmağa imkan verir. P.Floria, həmçinin ərazi planlaşdırması və davamlı torpaq istifadəsi sahələrində regional koordinasiyanın vacibliyini qeyd edib.
Müzakirələrdə iştirakçılar dəfələrlə BMT-nin Yeni Şəhər Gündəliyinin həyata keçirilməsinin sürətləndirilməsinin və rahat, ekoloji cəhətdən davamlı şəhər mühitinin yaradılmasına yönəlmiş Davamlı İnkişaf Məqsədlərinə nail olunmasının vacibliyini diqqətə çatdırıblar.
x x x
Sessiya çərçivəsində ayrıca bir müzakirə strateji planlaşdırmada və milli islahatların dəstəklənməsində beynəlxalq təşkilatların roluna həsr olunub. Çıxış edən BMT-nin Latın Amerikası və Karib hövzəsi üzrə İqtisadi Komissiyasının (CEPAL) nümayəndəsi Dieqo Aulestiyanın fikrincə, iqtisadi və sosial siyasətə kompleks yanaşma olmadan davamlı şəhər inkişafına nail olmaq mümkün deyil. “Bu gün şəhər siyasəti bərabərsizliyin azaldılması üçün əsas alət kimi qəbul edilməlidir. Mənzil, nəqliyyat və ictimai məkanlara qoyulan investisiyalar milyonlarla insanın həyat keyfiyyətinə və region iqtisadiyyatının dayanıqlığına birbaşa təsir göstərir”, - deyə CEPAL nümayəndəsi bildirib.
O qeyd edib ki, region ölkələri infrastruktur layihələrinin innovativ maliyyələşdirmə mexanizmlərini daha fəal şəkildə tətbiq etməli və dövlət ilə özəl sektorlar arasında tərəfdaşlığı inkişaf etdirməlidir.
Tədbirdə, həmçinin şəhər idarəçiliyinin rəqəmsallaşdırılması, “ağıllı” texnologiyaların tətbiqi və yaşayış məntəqələrinin təbii fəlakətlərə qarşı dayanıqlığının artırılması məsələləri müzakirə olunub. Bir neçə ölkədən olan nümayəndələr şəhəryeniləmə proqramlarının həyata keçirilməsi, sosial mənzil tikintisi və nəqliyyat sistemlərinin modernləşdirilməsi sahəsində təcrübələrini bölüşüblər.
Sessiya iştirakçıları qeyd ediblər ki, MINURVI mənzil və şəhərsalma siyasəti sahəsində regionun ən vacib hökumətlərarası platforması olaraq qalır. Forum 1992-ci ildə Latın Amerikası və Karib hövzəsi ölkələri arasında əməkdaşlığı gücləndirmək, ərazi inkişafı və şəhərsalma sahəsində təcrübə mübadiləsi aparmaq üçün yaradılıb.
Fəaliyyət göstərdiyi illər ərzində MINURVI davamlı inkişaf prinsiplərinin təşviqi və daha dayanıqlı, inklüziv şəhərlərin qurulmasına kömək edən regional siyasətlərin əlaqələndirilməsinə dair təsirli mexanizmə çevrilib.
Sessiyadan sonra iştirakçılar davamlı şəhər sistemlərinin inkişafı, keyfiyyətli mənzilə çıxışın genişləndirilməsi və regional əməkdaşlığın gücləndirilməsi üçün birgə iş aparmağa davam etməyə hazır olduğunu bir daha təsdiq ediblər. Vurğulanıb ki, qlobal çətinliklər qarşısında səylərin əlaqələndirilməsi və təcrübə mübadiləsi səmərəli şəhərsalmanı və region sakinlərinin həyat keyfiyyətinin yaxşılaşdırılmasını təmin etməyə qadirdir.
