Zəfər şəhidi Murad Vasıf oğlu Abbasov Lənkəranın Şıxəkəran kəndində dünyaya göz açıb. Vətənə sevgi, məhəbbət ruhunda boya-başa çatan Murad 2015-ci ildə orta təhsilini başa vurduqdan sonra ordu sıralarına yollanıb. O, cəbhə bölgəsində hərbi xidmətini bitirib üzüağ evinə qayıdıb.
Murad 2020-ci il İkinci Qarabağ müharibəsi başlayanda könüllü olaraq cəbhəyə gedib. Vətənin qeyrətli oğulları ilə əlinə silah alaraq yağıya qarşı vuruşub. Neçə-neçə qanlı savaşdan zəfərlə çıxan igid döyüşçü 2020-ci il oktyabrın 23-də şəhidlik zirvəsinə ucalıb. Bir gün sonra doğma kəndində Vətən torpağının sinəsinə baş qoyub. Azərbaycan ərazilərinin işğaldan azad olunması zamanı döyüş tapşırıqlarını və xidməti vəzifələrini şərəflə yerinə yetirdiyi üçün "Vətən uğrunda", Cəbrayılın, Qubadlının azadlığına görə medalları ilə təltif edilib.
Bu günlər Lənkəran şəhər Heydər Əliyev Mərkəzində "Tariximiz qürurumuzdur" layihəsi çərçivəsində Murad Abbasovun xatirəsinə həsr olunmuş mövlud mərasimi keçirilib. Lənkəran şəhər rəhbərliyi, N.Həsənov adına Şıxəkəran kənd tam orta məktəbinin müəllim və şagird kollektivi, təhsil və mədəniyyət işçiləri, şəhid ailələri, müharibə iştirakçıları və rayon ictimaiyyətinin nümayəndələrinin qatıldığı tədbir zamanı ölümsüzlüyə qovuşan Muradın foto və şəxsi əşyalarından ibarət sərgi ilə tanışlıq olub, Azərbaycan Respublikasının Dövlət Himni səslənib, Ümummilli Lider Heydər Əliyevin və şəhidlərin xatirələri birdəqiqəlik sükutla yad edilib.
Heydər Əliyev Mərkəzinin direktoru Reyhanə Sadıxova tədbiri açaraq şəhid Murad Abbasovun Vətən uğrunda göstərdiyi şücaətdən, onun qəhrəmanlıq yolundan danışıb, belə igidlərin xatirələrinin daim ürəklərdə yaşayacağını vurğulayıb. Çıxışını bitirən natiq mərkəzin rəsm kursunda şəhidin yağlı boya ilə çəkilmiş portretini anasına təqdim edib.
Çıxış edən digər natiqlər bildiriblər ki, bu qəhrəmanlıq salnaməsi Azərbaycan xalqının tarixində əbədi yaşayacaq, qərinələr boyunca gələn nəsillər Vətəni sevməyi, torpağını necə qorumağı bu qəhrəmanlardan öyrənəcəklər.
Şəhidin valideynləri tədbirin təşkilində əməyi olan hər kəsə təşəkkür edib, şəhid ailələrinə göstərilən diqqət və qayğıya görə ölkə rəhbərliyinə minnətdarlıqlarını bildiriblər.
Zəfər ORUCOÜLU,
Lənkəran şəhəri
677jpg_1781134810.jpg)
jpg_1781177334.jpg)
