Cahangir Dadaşov 1995-ci ilin payızında Sumqayıtda anadan olub. 39 saylı tam orta məktəbin şagirdi olan Cahangir hələ yeniyetməlik illərindən çevikliyi, vətənpərvərliyi ilə seçilib. Məktəb illəri onun üçün həm də xarakterinin formalaşdığı, gələcək həyat yolunun aydınlaşdığı illər olub.
2016-cı ilin iyulunda Cahangirin həyatında tamam başqa bir səhifə açılıb. O, vətənə xidmət etməyə başlayıb. Nişançı, motoatıcı, kəşfiyyatçı kimi yetişən Cahangir hərbin sirlərini öyrənib.
2020-ci ilin payızında Azərbaycanın tarixi yenidən yazıldı. Xalqın taleyini dəyişən, millətin birliyini möhkəmləndirən 44 günlük Vətən müharibəsi başladı. Cahangir də minlərlə igid kimi vətən çağırışına ilk cavab verənlərdən oldu. O, Füzuli istiqamətində döyüşə atıldı, ayağından güllə yarası aldı, lakin iradəsi qırılmadı. O, müalicəsini qurtaran kimi yenidən döyüşlərə qatıldı.
Oktyabrın 30-da düşmən minaatanı partlayanda hər iki qulağında pərdələr zədələnsə də, o, yenə döyüş meydanını tərk etmədi. Sol ayağından qəlpə yarası aldı, yenə də inadından dönmədi.
Cahangirin fədakarlığı və igidliyi dövlət tərəfindən yüksək qiymətləndirilib. O, "Vətən müharibəsinin iştirakçısı", "Füzulinin azad olunmasına görə", "Xocavəndin azad olunmasına görə", "Döyüşdə fərqlənməyə görə", "Hərbi xidmətdə fərqlənməyə görə", "Azərbaycan Ordusunun 100 illiyi" medalları ilə təltif edilib. Sinəsində gəzdirdiyi hər medal Cahangir üçün sadəcə metal parçası deyil. Onlar şücaətin, əzmin və vətən sevgisinin nişanəsidir.
Bu gün Cahangir Dadaşovun adı onun yaşadığı həyətdə, xidmət etdiyi bölmədə, döyüş yoldaşlarının yaddaşında qürurla çəkilir. O, ömür boyu daşıyacağı yaralarına baxmayaraq, bu gün də güclüdür, səbrli və məğrurdur. Onun keçdiyi yol bir gəncin həyat hekayəsidir. Bu hekayənin ilk sətri isə vətən kəlməsi ilə başlayır.
İsmayıl ƏLİZADƏ,
Sumqayıt şəhər sakini
jpg_1773441496.jpg)
