Vensin Azərbaycana səfəri iki ölkə arasındakı münasibətlərə müsbət impuls verəcək

Ötən ilin bu günlərində Münxen Təhlükəsizlik Konfransında "Avropa özünün yaratdığı böhranla üz-üzədir" deyən ABŞ vitse-prezidenti Ceyms Devid Vens bu günlərdə regionumuza səfər etdi. Səfər planına əsasən, Ermənistanda 9-10 fevral, Azərbaycanda 10-11 fevral tarixlərində rəsmi səfərdə olan Vensin hansı məsələlərlə bağlı iş aparacağını ABŞ Prezidenti Donald Tramp özünün "Truth" sosial şəbəkəsində qısaca bildirmişdi. 

Milli Məclisin deputatı Pərvanə Vəliyeva qəzetimizə açıqlamasında bildirib ki, Azərbaycanla hərbi və təhlükəsizlik sahəsində əməkdaşlığın müzakirəsi, bu sahədə ABŞ-dən satın alınacaq məhsullar, qarşılıqlı faydalı ticarət barədə müzakirələrin aparılması nəzərdə tutulur: "Vensin gəlişi öncəsi Prezident İlham Əliyev ABŞ Ticarət Palatasının nümayəndələri ilə görüşüb. Qeyd edim ki, ABŞ ilə Azərbaycan arasında strateji tərəfdaşlıq 3 istiqaməti əhatə edəcək: enerji, ticarət və tranzitin də daxil olduğu regional bağlantılar; süni intelekt və rəqəmsal infrasturukturun da daxil olduğu iqtisadi sərmayə; müdafiə sahəsində satış, terrorizmə qarşı mübarizədə əməkdaşlığın da daxil olduğu təhlükəsizlik sahəsində əməkdaşlıq". 

Deputat qeyd edib ki, yaradılan Strateji İşçi Qrupu regional bağlantılar infrastrukturunun və enerji sahəsində sərmayələrin genişləndirilməsi, eləcə də regional iqtisadi-ticari əməkdaşlığın irəlilədilməsi, həmçinin süni intellektin inkişafı kimi məsələlərdə əməkdaşlığın inkişafı üzrə çalışır. Bu isə ABŞ texnologiyasının və sərmayəsinin ölkəmizə gəlməsi deməkdir. 

P.Vəliyeva vurğulayıb ki, TRIPP yolunun işlək hala gətirilməsi üçün növbəti addımlar üzrə müzakirənin aparılması səfər proqramının tərkib hissəsidir: "Yanvarın 14-də Ağ Evdə, Ermənistan XİN rəhbəri Ararat Mirzoyan və ABŞ Dövlət katibi Marko Rubio arasında imzalanmış TRIPP İcra Çərçivəsi (TIF) adlı sənəddə bir çox məqama aydınlıq gətirilmişdi. Belə ki, bu sənəd bir daha Vaşinqton razılaşmalarına istinadən Naxçıvanın Azərbaycanın əsas hissəsi ilə maneəsiz keçidinin təmin edilməsini açıq və dəqiq şəkildə ifadə etmişdi. TRIPP Şərq-Qərb istiqamətində əsas nəqliyyat yoluna çevrilmək potensialına malikdir. Marşrutun investisiyalar, ticarət məkanına çevrilməsi hədəflənir. ABŞ coğrafi cəhətdən regionumuza uzaq olsa da, müasir dövrün ticarət və bağlantılar anlayışı bu stereotipi qırır. Bu gün artıq virtual bağlantılar da gündəmdədir. TRIPP çərçivə sənədində qeyd olunduğu kimi, Zəngəzur dəhlizi vasitəsilə xam materiallar, kritik minerallar, Yer kürəsində nadir tapılan metallar Amerika bazarlarına çıxarılacaq. Bu, beynəlxalq layihədir, təkcə Azərbaycanın və ya Ermənistanın gündəliyi deyil, marşrutdan Çindən Avropayadək, hətta ABŞ-dək uzanan bütün coğrafiyada olan ölkələr faydalanacaqlar". 

ABŞ administrasiyasının bölgədə yaranmış sülhü alqışladığını deyən deputat əlavə edib ki, tərəfdaşlıqların inkişafına təkan vermək məqsədilə vitse-prezident Ceyms Devid Vensi öz elçisi kimi Vaşinqton Sülh Sammitindən sonra ilk dəfə olaraq regiona göndərir. ABŞ liderinin Prezident İlham Əliyevə xüsusi ehtiramı var və onun apardığı uğurlu siyasətə böyük heyrətamizliklə yanaşır, onu ağıllı lider adlandırır. "Donald Trampın cənab Prezident İlham Əliyevi Yaxın Şərq Sülh Sammitinə şəxsən dəvət etməsi, Azərbaycanın Sülh Şurasına təsisçi ölkə kimi seçilməsi bir daha göstərir ki, Prezident Donald Tramp Azərbaycan xalqına, onun liderinə xüsusi rəğbət bəsləyir və onu yaxın tərəfdaşı kimi qəbul edir. Bu isə ABŞ ilə strateji tərəfdaşlığın daha da inkişafında özünü göstərir", - deyə P.Vəliyeva bildirib. 

Əsmər QARDAŞXANOVA,

"Azərbaycan"