ABŞ-nin yeni rəhbərliyinin ilk tədbirlərindən biri bu ölkənin maraqları ilə uzlaşmayan fəaliyyətlərin qarşısının alınması və bu çərçivədə maliyyə intizamının gücləndirilməsi oldu. Amerikalı milyarder İlon Maskın rəhbərlik etdiyi Hökumətin Səmərəliliyinin Artırılması Departamenti (DOGE) qısa müddətdə bu sahədə xeyli iş görüb.
Bu istiqamətdə atılan addımlardan biri son həftələrdə ABŞ Beynəlxalq İnkişaf Agentliyi (USAID) ətrafında baş verənlərdir. Donald Tramp administrasiyası araşdırmalardan sonra USAID-in proqramlarının 83 faizini rəsmən dayandırıb. "Altıhəftəlik araşdırmadan sonra biz USAID proqramlarının 83 faizini dayandırdıq. Ləğv edilən 5200 müqavilə çərçivəsində on milyardlarla dollar Birləşmiş Ştatların maraqlarına uyğun olmayan şəkildə və bəzi hallarda hətta onun zərərinə xərclənib", - deyə ABŞ Dövlət katibi Marko Rubio bununla bağlı bildirib. USAID-in proqramlarının rəsmən dayandırılmasının ardınca isə Prezident Donald Tramp bir neçə gün əvvəl ABŞ hökumətinin Qlobal Media Agentliyinin və digər hökumət strukturlarının fəaliyyət dairəsinin əhəmiyyətli dərəcədə azaldılması haqqında sərəncam imzalayıb. Qeyd edək ki, Qlobal Media Agentliyi "Azadlıq radiosu" və "Amerikanın səsi" radiostansiyalarına nəzarət edir. Bundan sonra "Amerikanın səsi"nin 1300-dən çox əməkdaşı inzibati məzuniyyətə göndərilib, radiostansiyanın özünün isə fəaliyyəti dayanıb. "Azadlıq Radiosu" da ABŞ hökumətindən maliyyələşdirmənin dayandırılmasına dair sənədin alınmasını təsdiqləyib.
Xatırladaq ki, İlon Mask hələ ötən ay "Azadlıq Radiosu" və "Amerikanın səsi" radiostansiyalarını bağlanmalı olduğunu bildirmişdi. Bununla bağlı sosial şəbəkə hesabında yazan Mask bu radiolara heç kim qulaq asmadığını və onların fəaliyyətinə ildə təxminən 1 milyard dollar xərcləndiyini demişdi.
Beləliklə, tarixi boyu USAID kimi bədnam əməllərlə məşğul olan, öz fəaliyyətini ayrı-ayrı dövlətlərə qarşı qarayaxma kampaniyası üzərində quran bu radiolar da indi layiq olduqları taleyə məhkum olunublar.
Həm USAID, həm də sözügedən bədnam radiostansiyalar onilliklər boyu Azərbaycan dövlətinə və xalqına qarşı da çirkin kampaniyalar təşkil ediblər. Demokratiya, insan hüquqları pərdəsinə bürünərək Azərbaycan dövlətinin uğurlarına, müstəqil siyasətinə kölgə salmağa çalışıblar, ölkəmizə şər və böhtan atıblar. Media etikasından uzaq olan bu radioların və məkr yuvası olan USAID-in Azərbaycana yanaşmasında hər zaman qərəzlilik, qeyri-obyektivlik, riyakarlıq müşahidə olunub. Azərbaycan nə vaxt beynəlxalq uğura imza atıbsa onlar respublikamıza qarşı təxribatçı fəaliyyətlə məşğul olublar. Həm bu radioların efirlərində, həm də USAID-in fəaliyyətində daim Ermənistanın işğal siyasətinə dəstək müşahidə olunub. USAID maliyyə vəsaiti ayırdığı, dəstəklədiyi təşkilatlar vasitəsilə respublikamızda pozuculuq fəaliyyəti həyata keçirməyə çalışıb. Azərbaycanın torpaqlarını işğaldan azad etməsindən sonra isə bu təşkilat ölkəmizə qarşı yeni məkrli planlar işə salmış, o cümlədən xalqımızın ən böyük üstünlüklərindən biri olan ailə və milli dəyərlərini hədəfə almışdı.
Qeyd edək ki, Azərbaycanda sağlam düşüncəli, dövlətçilik mövqeyi olan insnalar bu şər yuvalarının əsl niyyətlərini hər zaman ifşa ediblər, onlara işləyən xəyanətkarların simalarını açıb göstəriblər. Azərbaycan KİV-ində həm USAID-in, həm də "Azadlıq Radiosu" və "Amerikanın səsi" radiolarının fəaliyyəti ilə bağlı çoxsaylı tənqidi yazılara rast gəlmək mümkündür.
Artıq onların hər biri layiq olduqları yerdədirlər. Hər zaman yalnız nifrətlə xatırlanacaq bu riyakar qurumlar fəaliyyətlərini dayandırmaqla layiq olduqları taleyi yaşayırlar. Onları cəzalandıran isə elə ABŞ dövlətinin özüdür.
Rəşad CƏFƏRLİ,
"Azərbaycan"
jpeg_1765897678.jpeg)
