Ukraynada komendant saatı rejimi ləğv edilmir və yenidən tətbiq olunması da nəzərdən keçirilmir. Eyni zamanda, istilik və ya elektrik enerjisinin uzunmüddətli kəsilməsi zamanı istisnalar mümkün ola bilər.
Bu barədə AZƏRTAC Ukraynanın Baş nazirinin ərazilərin bərpası üzrə müavini, icmaların və ərazilərin inkişafı naziri Aleksey Kulebanın Teleqramda yaydığı məlumata istinadla xəbər verir.
O, energetika naziri Denis Şmıqalın sədrliyi ilə Kiyevdə enerji obyektlərinə Rusiya tərəfindən endirilən zərbələrin nəticələrinin aradan qaldırılması üzrə qərargahın ilk iclasında iştirak edib.
Həmin iclasda iştirakçılar birinci dərəcəli qərarlara, yəni bərpa işlərinin sürətləndirilməsinə, avadanlıq ehtiyatlarının formalaşdırılmasına və beynəlxalq tərəfdaşlarla koordinasiyaya fokuslanıblar. Həmçinin Prezident Volodimir Zelenskinin tapşırığı ilə komendant saatı və Dayanıqlılıq (Məğlubedilməzlik) Məntəqələrinin fəaliyyəti məsələsinə ayrıca baxılıb.
“İstilik və ya elektrik enerjisi uzunmüddətli kəsiləcəyi təqdirdə, dövlət təhlükəsizliklə bağlı qərarları pozmadan çevik hərəkət etməlidir”, – deyə Baş nazirin müavini qeyd edib.
Aleksey Kulebanın sözlərinə görə, söhbət həyat təminatı üçün kritik əhəmiyyətli obyektlərin fasiləsiz fəaliyyətinin təmin olunmasına, insanların Dayanıqlılıq (Məğlubedilməzlik) Məntəqələrinə təhlükəsiz şəkildə çatmasına, sığınacaqlara çıxışa imkan yaradılmasına, həmçinin bu funksiyanı rəsmi şəkildə yerinə yetirən müəssisələrin fəaliyyətinin təmin olunmasına şərait yaradan mümkün müvəqqəti və konkret istisnalardan gedir.
“Belə qərarlar yalnız hərbi komandanlığın və Müdafiə şuralarının iştirakı ilə yalnız təhlükəsizlik vəziyyətinin buna imkan verdiyi yerlərdə qəbul edilə bilər. Yerlərdə özbaşına heç bir qərar qəbul edilə bilməz”, – deyə o vurğulayıb.
Xatırladaq ki, yanvarın 14-də fövqəladə hallar üzrə keçirilən müşavirənin yekunlarına əsasən Ukrayna Prezidenti energetika sahəsində fövqəladə vəziyyətin elan olunması barədə qərarın qəbul edildiyini bildirib. O, həmçinin deyib ki, Ukraynanın bəzi şəhər və icmalarında komendant saatı ləğv oluna bilər. Belə bir qərar energetika sahəsində yaranmış fövqəladə vəziyyətlə əlaqədar mümkündür. Dövlət başçısı, eyni zamanda, güclü şaxtalar fonunda Ukraynada komendant saatı ilə bağlı qaydaların dəyişdiriləcəyini də bildirib.
jpeg_1768482651.jpeg)
