Türkiyənin antiterror əməliyyatı davam edir

Hulusi Akar ilin əvvəlindən bəri 3585 terrorçunun zərərsizləşdirildiyini bəyan edib

Noyabrın 21-də YPG terrorçuları Türkiyənin cənubuna raket zərbələri endirib. Qaziantep vilayətinin Karkamış sərhəd bölgəsinin atəşə tutulması Suriyanın şimalından həyata keçirilib. Qaziantep valisi Davud Gül bildirib ki, terrorçular ümumilikdə Karkamış bölgəsinə 5 mərmi atıb, nəticədə 3 nəfər ölüb, 6 nəfər yaralanıb.
Bundan əlavə, Suriya ilə həmsərhəd Kilis vilayətinə raket zərbələri endirilməsi nəticəsində türk hərbçiləri yaralanıb. YPG/PKK terrorçuları Oncupınar keçid məntəqəsini atəşə tutub.
Türkiyə ordusu bölgədə terror təhlükəsinin aradan qaldırılması üçün əməliyyatlara başlayıb. Cinayət təşkilatlarının obyektlərinə hücumlar həm Türkiyə daxilində, həm də onun hüdudlarından kənarda həyata keçirilir. Bunu Türkiyənin Milli Müdafiə naziri Hulusi Akar dünən parlamentdə ölkənin müdafiə nazirliyinin büdcəsi ilə bağlı müzakirələrdə çıxışı zamanı deyib. 
Terrorçuların hərəkətlərinə cavab olaraq noyabrın 20-nə keçən gecə Türkiyə Silahlı Qüvvələri Pençe-Kılıç əməliyyatı keçirib. Birinci mərhələdə İraq və Suriyanın şimalında terrorçuların 81 hədəfi, sonra isə qanlı təşkilatın yaraqlılarının daha 8 yerləşdirmə məntəqəsi məhv edilib.
Müdafiə Nazirliyinin rəhbəri Türkiyə Silahlı Qüvvələrinin son illərdə apardığı əməliyyatların statistik məlumatlarına istinad edib.
Akarın dediyinə görə, bu il yanvarın 1-dən indiyədək Türkiyə Silahlı Qüvvələri ölkə ərazisində, eləcə də Şimali İraq və Suriyada 3585 terrorçunu zərərsizləşdirib, ümumilikdə Türkiyənin antiterror mübarizəsinin yeni mərhələsinin başladığı 24 iyul 2015-ci il tarixdən bu rəqəm 36 854 nəfər təşkil edir.
Nazir Türkiyənin istənilən sakininin ölümünün qanlı cinayətkar təşkilatlar üçün ağır nəticələr verəcəyini vurğulayıb.
Akar Türkiyə Silahlı Qüvvələrinin bu ilin aprelindən bəri Şimali İraqın 3 bölgəsində davam etdirdiyi "Pençe-Kilit" əməliyyatından da danışıb. "Pençe-Kilit əməliyyatı çərçivəsində 460 terrorçu zərərsizləşdirilib, 530 min döyüş sursatı olan anbar aşkar edilib, 1146 silah, 1929 mina və partlamamış hərbi sursat ələ keçirilib", - deyə nazir vurğulayıb.
Nazirin dediyinə görə, ölkənin təhlükəsizliyinin mühüm tərkib hissəsi dövlət sərhədinin pozulması hallarının qarşısının alınmasıdır.
Hulusi Akar bildirib ki,  təkcə ilin əvvəlindən Türkiyə hərbçiləri 234 282 nəfərin sərhədi qanunsuz keçməsinin qarşısını alıb, 7 107 qanunsuz miqrantı saxlayıb. 724 terrorçu yaxalanaraq hüquq-mühafizə orqanlarına təhvil verilib".
Egey dənizi və Aralıq dənizinin şərq hissəsindəki vəziyyətə toxunan türkiyəli nazir vurğulayıb ki, Türkiyə regionda Ankaranın maraqlarını pozacaq status-kvonun formalaşmasına imkan verməyəcək.

R.HİLALOĞLU,
"Azərbaycan"