Ölkələrarası münasibətlərdə və bir neçə dövlətin iştirak etdiyi region əlaqələrində birinci dərəcəli prioritet siyasi sabitlikdir. Siyasi sabitlik olmadan nə iqtisadi, nə də humanitar əlaqələrin təmin edilməsi mümkün deyil. Dünya çox sürətlə dəyişir və bu dəyişən şəraitdə yeni əməkdaşlıq sahələri, imkanlar meydana çıxır ki, bunların da əsasını siyasi sabitlik təşkil edir. Bu baxımdan, Azərbaycan ilə Ermənistan arasında əldə olunacaq razılaşma iki ölkəyə sülh gətirməklə yanaşı, İran, Gürcüstan, Türkiyə, Rusiya, Çin, İngiltərə və hətta Albaniyanı da müxtəlif perspektivlər və əməkdaşlıq sahələri çərçivəsində bir-birinə bağlayacaq.
Bu fikirləri AZƏRTAC-a açıqlamasında Türkiyənin Azərbaycandakı keçmiş hərbi attaşesi, ehtiyatda olan general Yücel Karauz səsləndirib.
General deyib ki, Qarabağ Zəfərindən sonra Prezident İlham Əliyevin vurğuladığı kimi, Ermənistanın gecikmiş olsa da bu reallığı qəbul etməsi həm regional, həm də qlobal mənada Qafqaz regionunu sülhün mərkəzi mövqeyinə gətirəcək. Azərbaycanın və Türkiyənin birgə səyləri regionu sülh, sabitlik, əməkdaşlıq mühitində enerji siyasəti, logistika və nəqliyyat layihələri baxımından daha əhəmiyyətli statusa yüksəldəcək.
Yücel Karauz bildirib ki, dünyanın iqtisadi güc mərkəzlərindən biri olan Çin yalnız Uzaq Şərqə deyil, siyasi, hərbi və iqtisadi potensialı ilə bütün dünyaya qlobal səviyyədə təsir edir. Bəzi ölkələrdə mövcudluğunu qoruyan Çin digər regionlarda da logistika və başqa sahələrdəki inkişaf sayəsində həmin dövlətlərlə münasibətlər qurmağa çalışır.
“Prezident, Ali Baş Komandan İlham Əliyevin uzaqgörən siyasəti sayəsində Azərbaycan-Çin münasibətlərinin güclənməsi Azərbaycanı müxtəlif ölkələrlə balanslı və tənzimlənən əməkdaşlıq imkanları baxımından üstün mövqeyə gətirib çıxarıb. Təbii ki, bu çevik diplomatiya Azərbaycanı daha da güclü edir. Azərbaycan yalnız Türkiyə, ABŞ, Çin kimi böyük dövlətlərlə deyil, digər ölkələrlə də əməkdaşlıq zəminində, milli maraqları istiqamətində çoxşaxəli xarici siyasət həyata keçirir. Eyni zamanda düşünürəm ki, viza rejimi məsələsi də vacib mövzudur”, - deyə ekspert bildirib.
