Türkiyə və Azərbaycan arasındakı münasibətlərin mövcud səviyyədə qorunması bölgədə sabitliyin təminatıdır və Cənubi Qafqazda dayanıqlı sülhün təməl daşını təşkil edir.
AZƏRTAC xəbər verir ki, bu fikirləri Ankaradakı Avrasiya Araşdırmaları Mərkəzinin (AVİM) eksperti Hazel Çağan Elbir bildirib. Onun sözlərinə görə, qardaş ölkələrin ittifaqı iki xalqın tarixi və mədəni birliyinə əsaslanır, hər iki dövlətin strateji maraqlarına cavab verir.
“Türkiyə və Azərbaycanın qarşılıqlı fəaliyyəti “Bir millət, iki dövlət” ifadəsinin təcəssümüdür və regionda qüvvələr balansının formalaşmasında əsas rol oynayır”, – deyə H.Ç.Elbir vurğulayıb.
Ekspert qeyd edib ki, Ankara və Bakının xarici siyasətinin fəal koordinasiyası Cənubi Qafqazda sabitliyi möhkəmləndirir: “Heç də təsadüfi deyil ki, rəsmi Ankara İrəvanla münasibətlərin normallaşdırılmasını Azərbaycan və Ermənistan arasında danışıqlarda əldə edilən irəliləyişlə açıq şəkildə əlaqələndirir. Bu, Türkiyənin strateji seçimidir və göstərir ki, iki qardaş ölkənin maraqları sıx şəkildə bir-biri ilə bağlıdır, Ankara və Bakı qarşılıqlı etimada əsaslanan tərəfdaşlıq modeli qurublar”.
“Regiondakı proseslərə istənilən yanaşma qərəzsiz olmalı, Cənubi Qafqazın tarixi reallıqlarına və beynəlxalq hüquq normalarına əsaslanmalı, tərəflərin qarşılıqlı maraqları nəzərə alınmalıdır”, – deyə Ankara analitik mərkəzinin eksperti vurğulayıb.
O, ekspert icmasını və xarici siyasətçiləri Türkiyə və Azərbaycan ittifaqının mədəni və strateji “dərinlik” amilini əsas götürməyə çağırıb.
AVİM eksperti əminliyini ifadə edib ki, “Türkiyə və Azərbaycanın həmrəyliyi Qafqaz regionundakı ziddiyyətlərin qordi (gordian) düyününü açmağa imkan verəcək”.
jpeg_1765884927.jpeg)
jpeg_1765884704.jpeg)
