Türkiyə və Şimali Kipr Türk Cümhuriyyətinin (ŞKTC) aparıcı xəbər agentlikləri, telekanalları, xəbər portalları və qəzetləri Azərbaycan qazının Türkiyənin cənubundakı Kilis vilayəti vasitəsilə Suriyaya nəqlinə başlanması mərasimini geniş işıqlandırıb.
AZƏRTAC xəbər verir ki, qardaş ölkələrin əksər media orqanı Azərbaycan və Qətər nümayəndə heyətlərinin iştirakı ilə keçirilən mərasimdən canlı yayım təşkil edib.
Materiallarda Türkiyənin enerji və təbii sərvətlər naziri Alparslan Bayraktarın Azərbaycana və Qətərə minnətdarlıq sözlərinə diqqət yetirilib.
Azərbaycan qazının Suriyaya nəqli bu ölkədə normal həyatın bərpası, o cümlədən qaçqınların öz vətənlərinə könüllü qayıtması kontekstində mühüm amil kimi vurğulanır.
A.Bayraktarın Kilis vilayətindəki Yavuzlu qazpaylayıcı stansiyası vasitəsilə Suriyaya sutkada 6 milyon kubmetrədək Azərbaycan qazının veriləcəyi sözləri vurğulanıb. Eyni zamanda, Azərbaycan qazı Hələbə, daha sonra isə Suriyanın Homs şəhərinə tədarük ediləcək və bu, Suriyada elektrik stansiyalarının fəaliyyətinin bərpasına imkan verəcək.
Media orqanları türkiyəli nazirin aşağıdakı sözlərini sitat gətirir: “Birinci mərhələdə Suriyaya 2 milyard kubmetrə qədər qaz tədarük ediləcək ki, bu da 1,2 min MVt elektrik enerjisi istehsal etməyə və 5 milyon abonenti elektrik enerjisi ilə təmin etməyə imkan verəcək. Bütün bunlar Suriyada vəziyyətin normallaşmasına mühüm töhfə verəcək”.
Mətbuat orqanları Türkiyə ilə Azərbaycan arasında enerji sektorunda uğurlu əməkdaşlığa da diqqət çəkiblər. Bunun bariz nümunəsi olaraq, İğdırdan Naxçıvana çəkilən qaz kəməri göstərilir.
Medianın materiallarında Azərbaycan qazının Suriyaya tədarükünün başlanması “ölkələr arasında əsl dostluq və qardaşlığın göstəricisi, bütövlükdə regionun inkişafına töhfə” adlandırılıb.
jpeg_1765897678.jpeg)
