Türkiyə Prezidenti Rəcəb Tayyib Ərdoğan Ankaranın F-35 beşinci nəsil təyyarələrinin hazırlanması və istehsalı proqramında iştirakının bərpasının vacib olduğunu bildirib.
AZƏRTAC xəbər verir ki, Türkiyə lideri “Bloomberg”ə verdiyi müsahibədə Ankaranın F-35 proqramında iştirakının bərpa edilməsini “ABŞ ilə münasibətlərin inkişafına töhfə” və “NATO təhlükəsizliyinin gücləndirilməsi” adlandırıb.
Prezident Ərdoğan sentyabr ayında Prezident Donald Trampla görüşünü xatırladıb. O, həmin görüşdə F-35 məsələsini qaldırmışdı.
Türkiyə dövlətinin başçısı Ankaranın Rusiya silah növlərini alması səbəbindən Türkiyənin F-35 proqramından çıxarılması barədə qərarı “ədalətsiz” adlandırıb.
Prezident Ərdoğan bununla bağlı bildirib: “Donald Trampın ABŞ prezidentliyinə qayıdışı ilə Türkiyə-Amerika münasibətlərini daha ağlabatan və müsbət təmələ keçirmək üçün bir fürsət yaranıb. Türkiyənin, Ankaranın artıq pulunu ödədiyi F-35 təyyarələrini alması və onun bu proqrama yenidən daxil edilməsi təkcə iki strateji tərəfdaş - Türkiyə və ABŞ arasındakı əlaqələr üçün deyil, həm də NATO-nun təhlükəsizliyi baxımından vacib və zəruridir”.
Rusiya ilə Ukrayna arasındakı müharibə mövzusuna gəldikdə, Türkiyə lideri bildirib ki, hazırda Türkiyə hər iki münaqişə tərəfinin liderləri ilə birbaşa ünsiyyət qura bilən yeganə aktordur. “Ankara, eyni zamanda, Vaşinqton və Brüssel ilə dialoqda, eləcə də NATO və BMT platformalarında Ukrayna ilə bağlı konkret təşəbbüslər ilə çıxış edir. Türkiyə Ukraynadakı müharibə ilə bağlı möhkəm və balanslı diplomatik əlaqələr saxlaya bilən yeganə ölkədir”, - deyə siyasətçi qeyd edib.
jpg_1767211798.jpg)
