Artıq bir neçə gündür Türkiyə mətbuatı Azərbaycanın təqdim etdiyi investisiya və biznes imkanları barədə ətraflı məlumatlar yayımlayır. Növbəti belə xəbər ölkənin “Hürriyet”, “Milliyet” və “Posta Ekonomi” qəzetlərində nəşr edilib.
AZƏRTAC xəbər verir ki, “İşğaldan azad edilən Ağdamda istehsal başladı”, “Xarici investisiyanı sizə xaric olmayan Azərbaycana edin”, “Dövlətin mesajı sənayeni böyütmək”, “Ağdamda təşviq yağışı” kimi müxtəlif başlıqlarla yayımlanan yazılarda ölkəmizin müxtəlif bölgələrdə, o cümlədən Qarabağda həyata keçirdiyi irimiqyaslı layihələr ilə bağlı ətraflı məlumat verilib.
Məqalələrdə Azərbaycanın işğaldan azad etdiyi ərazilərini “ağıllı və yaşıl” bir gələcəyə doğru apararkən, türkiyəli investorlara vergi azadlığından tutmuş aşağı faizli kreditlərə, dövlət tərəfdaşlığından sosial sığorta dəstəyinədək misilsiz imkanlar təqdim etdiyi vurğulanıb.
Azərbaycanın Türkiyədəki ticarət nümayəndəsi Tamerlan Tağıyev, İqtisadi Zonaların İnkişafı Agentliyinin investisiya və iqtisadi təhlil bölməsinin müdiri Aqşin İbişsoy, Ələt Azad İqtisadi Zonasının Səlahiyyətli Qurumunun İdarə Heyətinin sədri Valeh Ələsgərov, eləcə də Azərbaycanda fəaliyyət göstərən türkiyəli iş adamlarının müsahibələrinə geniş yer verilən yazılarda Türkiyə şirkətlərinin ölkəmizdəki biznes qurmaları, eləcə də təklif olunan imtiyazlardan istifadə imkanlarının əhəmiyyəti vurğulanıb.
Məqalələrdə Azərbaycanın qeyri-neft sektorunda atdığı mühüm addımlar, investorlar üçün yaradılan böyük imkanlar, ölkəmizlə bölgədəki 280 milyon əhaliyə sahib təxminən on ölkə arasında mövcud Sərbəst Ticarət Anlaşması kimi mühüm mövzulara yer verilib.
Qeyd edək ki, məqalə qardaş ölkənin bir sıra nüfuzlu media qurumlarının əməkdaşlarının Azərbaycana, o cümlədən işğaldan azad edilmiş ərazilərimizə səfəri əsasında hazırlanıb. Türkiyəli jurnalistlərin ölkəmizə səfəri Azərbaycanın Türkiyədəki ticarət nümayəndəsi aparatının təşkilatçılığı ilə baş tutub.
jpg_1765800994.jpg)
jpg_1765800788.jpg)
