ABŞ Prezidenti Donald Tramp bildirib ki, o, Rusiya lideri Vladimir
Putindən "çox məyusdur" və buna görə Ukraynada nizamlanma üçün ultimatumun
müddətini qısaldır - 10-12 gün. Xatırladaq ki, bundan əvvəlkinin müddəti
sentyabrın 1-də bitməli idi.
Tramp Böyük Britaniyanın Baş naziri Kir Starmer ilə görüşündə bildirib:
"Prezident Putinlə dörd-beş dəfə danışdım, lakin sonra o, Ukraynanın şəhərlərinə
raket atdı... Belə olmamalıdır. Prezident Putindən çox məyus oldum. Bunun necə
nəticələnəcəyini görəcəyik. Mən bunu 50 günə qədər qısaldacağam, çünki düşünürəm
ki, bunun necə bitəcəyini bilirəm".
Bu arada Rusiya Müdafiə Nazirliyi iyulun 28-də gecə saatlarında hərbi
aerodrom infrastrukturuna, sursat anbarına, raket silahlarına və Ukraynada
pilotsuz təyyarələrin istehsalı üçün komponentlərə "Kinjal" hipersəs
raketləri, eləcə də hücum dronları da daxil olmaqla, "uzaq mənzilli
havadan buraxılan dəqiqlikli silahlarla qrup zərbəsi" endirdiyi barədə məlumat
verib. Məlumatda bildirilib ki, zərbələr yalnız Ukraynadakı hərbi və enerji
obyektlərinə və onlarla əlaqəli infrastruktura endirilir.
Xatırladaq ki, iyulun 14-də Tramp Rusiyanın hərəkətlərindən "məyus olduğunu" bildirib və 50 gün
ərzində Ukrayna ilə dialoqda irəliləyiş əldə olunmayacağı halda Moskva və onun
ticarət tərəfdaşlarına "təxminən 100 faiz" ikinci dərəcəli tariflər tətbiq
edəcəyini açıqlamışdı. Eyni zamanda ABŞ Prezidenti Kiyevi yeni silahlarla təmin
edəcəyini vəd etmişdi.
Kreml Trampın bəyanatlarını çox ciddi adlandırıb və onların təhlil edilməsinə
ehtiyac olduğunu qeyd edib. Prezidentin mətbuat katibi Dmitri Peskovun sözlərinə
görə, Ukrayna ABŞ-nin qərarlarını "müharibənin davam etdirilməsi üçün
siqnal kimi" qəbul edir.
Qeyd edək ki, Ağ Evin rəhbəri bu yaxınlarda dəfələrlə Putindən məyus
olduğunu bildirib. Tramp ultimatumdan sonra deyib: "Məyusluq o faktla
bağlıdır ki, mən, Rusiya ilə sövdələşməni artıq dörd dəfə əldə olunmuş hesab
etmişəm". Amerika lideri Rusiya Prezidenti ilə gələcək münasibətləri barədə
suala belə cavab verib: "Mən məyus oldum, lakin onunla işim hələ bitməyib". Eyni zamanda Tramp
tərəf tutmadığını iddia edib.
Həftəsonu ABŞ dövlət katibi Marko Rubio da xəbərdarlıq edib ki, Trampın
"səbri tükənib" və Rusiyanın döyüşləri dayandırmaq üçün addımlar
atmasını "gözləməyə daha az hazırdır". Dövlət Departamentinin rəhbəri
vurğulayıb ki, Prezident hələ də münaqişənin həllində maraqlıdır və ona son
qoymaq üçün konkret addımlar gözləyir.
Rizvan CƏFƏROV,
"Azərbaycan"
png_1765896393.png)
