Tovuz kəndlisinin əsas qazanc mənbəyidir
Ölkənin qərb bölgəsində yerləşən böyük rayonlardan biri də Tovuzdur. Gözəl təbiəti, zəngin yeraltı və yerüstü sərvətləri olan rayonun insanları olduqca işgüzardır.
Tovuzda kənd təsərrüfatının bütün sahələrinin inkişafı istiqamətində əməli addımlar atılır. Bunun nəticəsidir ki, keçən il təsərrüfat sahibləri 131211 hektar əkinəyararlı torpaq sahəsindən maksimum istifadə edərək bol məhsul yetişdirmişlər. Əvvəlki illərdə olduğu kimi, ən çox diqqət taxıl istehsalına yönəldilmişdir. Ümumilikdə 11318 hektarda taxıl əkilmişdir ki, onun da 9313 hektarı payızlıq buğda, 2005 hektarı payızlıq arpa olmuşdur. Fermerlər 1318 hektar sahədə taxıl biçini apararaq zəmilərdən 46302 ton məhsul götürmüşlər. Onlar 9313 hektar sahənin hər hektarından 41,7 sentner olmaqla 38802 ton buğda, 2005 hektar sahənin hər hektarından 37,4 sentner olmaqla 7500 ton arpa biçmişlər.
Taxılçılar cari ilin məhsulu üçün də səylə çalışırlar. Cari ilin məhsulu üçün 14325 hektara payızlıq taxıl səpilmişdir. Onun 12177 hektarı payızlıq buğda, 2148 hektarı payızlıq arpadır. Bu günə qədər 8148 hektarda suvarma aparılmışdır.
Rayonda iqtisadi cəhətdən gəlirli olan üzümçülüyün də inkişafına diqqətlə yanaşılır. Hazırda Tovuzda 1185 hektar üzüm bağı mövcuddur və bunun 1099,5 hektarı barverən, 85,5 hektarı gənc bağlardır. Bağların 775 hektarında süfrə, 410 hektarında texniki üzüm sortları yetişdirilir. Söz düşmüşkən qeyd edək ki, keçən il barverən sahələrin hər hektarından 285,5 sentner olmaqla ümumilikdə 31395 ton məhsul toplanmışdır. Bu günlər bağbanların işi daha çoxdur. Onlar sahələrdə yeni bağların salınması, qış budaması, xəstəlik və zərərvericilərə qarşı mübarizə, cərgə aralarının şumlanması və digər aqrotexniki işlər aparırlar.
Tovuzda 2365,7 hektar sahədə meyvə və giləmeyvə də yetişdirilir. Onlardan 1718 hektarı barverən, 647,7 hektarı bar verməyəndir. Ötən il barverən sahələrin hər hektarından 176,4 sentner olmaqla 30300,7 ton məhsul yığılmışdır. Bu günlər sahələrdə yeni bağların salınması, budama, cərgə aralarının şumlanması və digər aqrotexniki işlər aparılır.
Tovuzlular kartofçuluqda da yüksək göstəricilərə nail olurlar. 2025-ci ildə rayonda 4492 hektarda kartof əkilmiş, hər hektardan 304,6 sentner olmaqla 136803,1 ton məhsul yığılmışdır. Hazırda fermerlər kartof və digər tərəvəz bitkiləri əkiləcək sahələri şumlayır, bəzi ərazilərə kartof toxumu səpilir. İndiyədək 150 hektar sahədə səpin aparılmışdır.
Sabir ƏLİYEV,
"Azərbaycan"
