2020-ci ildə Vətən müharibəsindən sonra Prezident İlham Əliyevin müəyyənləşdirdiyi prinsiplər əsasında Ermənistana sülh təklif olunması, Azərbaycanın beş il ərzində bu istiqamətdə praktiki addımları Vaşinqtonda ABŞ Prezidenti Donald Trampın şahidliyi ilə sülh sazişinin paraflanması ilə nəticələnib.
Hazırkı dünya düzənində öz gücü hesabına hərbi-siyasi yolla torpaqlarını işğaldan azad etmək, ərazi bütövlüyünü və suverenliyini tam bərpa etmək, de-fakto sülhə nail olmaq böyük qətiyyət, güclü siyasi iradə və əzmkarlıq tələb edir. Azərbaycan isə bütün bunları Prezident İlham Əliyevin düşünülmüş və praqmatik siyasəti sayəsində əldə edib. Məhz buna görədir ki, ölkəmiz dünyada güclü və qüdrətli, etibarlı tərəfdaş və sülh tərəfdarı kimi tanınır.
Milli Məclisin Aqrar siyasət komitəsinin sədri Tahir Rzayev qəzetimizə açıqlamasında bildirib ki, Prezident İlham Əliyev fəaliyyətinin bütün dövrlərində sülhün, əmin-amanlığın tərəfdarı olub. Ən mötəbər tribunalardan bu barədə dəfələrlə çağırışlar edib: "Ölkəmiz müharibə şəraitində olduğu, torpaqlarımız işğal altında qaldığı dövrlərdə, eləcə də qələbə çaldığımız zaman və bu gün də Prezident İlham Əliyev sülh uğrunda qətiyyətli mübariz olduğunu ortaya qoyub. Əlbəttə, bu, bir çox ölkə, dünya lideri tərəfindən yüksək qiymətləndirilir. Eyni zamanda Azərbaycan Yaxın Şərqdə sülhə töhfə verən, bu təşəbbüslərlə çıxış edən dövlətlərdən biridir və buna görə ABŞ-nin sülh planını dəstəkləyir. Bu baxımdan Prezident İlham Əliyevin sülh təşəbbüslərini, bu istiqamətdə ardıcıl səylərini yüksək qiymətləndirən ABŞ Prezidenti Donald Trampın Sülh Şurasının yaradılmasında təsisçi üzv dövlət qismində Azərbaycanı dəvət etməsi təsadüfi deyil".
T.Rzayev qeyd edib ki, Davosda keçirilən Dünya İqtisadi Forumunda dövlət başçısına yüksək diqqət göstərilməsi və ölkəmizin Sülh Şurasının təsisçi üzv dövlətlərindən biri kimi seçilməsi Azərbaycan rəhbərinə göstərilən böyük hörmət və ehtiramın ifadəsidir. Sülh, əmin-amanlıq nəinki bir dövlət üçün, ümumiyyətlə, bəşəriyyətin gələcəyi üçün vacib və əhəmiyyətlidir. "Vaşinqton görüşü, eləcə də sonrakı mərhələlərdə Azərbaycan-Ermənistan münasibətlərinin yaxşılaşdırılmasına doğru atılan addımlar Ağ Evdə Azərbaycan və Ermənistan arasında əldə olunan razılaşma, "Azadlığa Dəstək Aktı"na edilən 907-ci düzəlişin dayandırılması, Zəngəzur dəhlizinin açılmasına göstərilən cəhdlər məhz sülhə verilən önəmdir", - deyə deputat əlavə edib.
Komitə sədri xatırladıb ki, Prezident İlham Əliyev Davosda bir çox ölkə rəhbərləri ilə keçirdiyi görüşlərdə, danışıqlarda sülhməramlı olduğunu bir daha ortaya qoyub. Dövlət başçısı dünyada əməkdaşlığa, dostluğa böyük önəm verdiyini daim nümayiş etdirir.
T.Rzayev vurğulayıb ki, Davos İqtisadi Forumu Prezident İlham Əliyevin sülh, əmin-amanlıq uğrunda çalışdığını bir daha sərgilədi: "Sevindirici haldır ki, bu gün Azərbaycan dünyanın tanınmış, inkişaf etmiş ölkəsi kimi qəbul olunur. Bu, Azərbaycanın uğurlu gələcəyindən, Cənubi Qafqazda dayanıqlı sülhün formalaşmasından, sabitliyin bərpa edilməsindən xəbər verir".
Əsmər QARDAŞXANOVA,
"Azərbaycan"
jpg_1769545546.jpg)
