Şəhidlik uca zirvə olmaqla yanaşı, həm də qəhrəmanlıq məktəbidir. Biz o məktəbdən igidliyi, mərdliyi, cəsurluğu, Vətən uğrunda candan keçməyin nə olduğunu öyrənirik. Ağəmməd Ağamalıyev də 44 günlük Vətən müharibəsində torpaqlarımızın azadlığı uğrunda şəhidlik zirvəsinə yüksələrək özündən sonra böyük idiglik nümunəsi miras qoyub.
AZƏRTAC-ın bölgə müxbirinin verdiyi məlumata görə, Ağamalıyev Ağəmməd Elgiz oğlu 1990-cı il noyabrın 16-da Samux rayonunun Füzuli kəndində anadan olub. 1996-2005-ci illərdə şəhid əmisi Şahmalı Ağamalıyevin adını daşıyan Füzuli kənd tam orta məktəbində təhsil alıb. 2020-ci il sentyabrın 27-də Ermənistanın işğalı altında olan torpaqlarımızın azad edilməsi və Azərbaycanın ərazi bötüvlüyünün bərpa olunması uğrunda başlanan 44 günlük Vətən müharibəsində döyüşlərə qatılıb. Oktyabrın 13-də Füzulinin azad edilməsi uğrunda gedən döyüşlər zamanı qəhrəmancasına şəhid olub. Ağəmməd Ağamalıyevin nəşi oktyabrın 19-da doğulub boya-başa çatdığı Füzuli kəndində torpağa tapşırılıb.
Şəhid anası Zibər Ağamalıyeva deyir ki, övladı hər zaman Birinci Qarabağ müharibəsinin şəhidi və müharibə veteranı olan əmilərini örnək götürüb. Vətənpərvər ruhda böyüyüb, torpaqlarımızın düşmən tapdağından azad ediləcəyi günü səbrsizliklə gözləyib. Vətən müharibəsinə də böyük qürurla yollanıb. “Qaynım 1990-cı ildə Birinci Qarabağ müharibəsinə getmişdi, 1994-cü ildə şəhid oldu. Ağəmməd deyirdi ki, əmisinin qısasını alacaq. Müharibə başlayanda döyüşlərə qatıldı. Füzulidə olanda mənə zəng etdi və dedi ki, “əmimin qisasını alıb gələcəyəm”. Əmisi Füzulidə harada şəhid olmuşdusa, övladım da orada şəhid oldu. Mən oğlumun şəhidlik zirvəsinə yüksəlməsi ilə qürur duyuram”, - deyə Zibər Ağamalıyeva bildirir.
Şəhid Ağəmməd Ağamalıyev evli olub, Zeynəb adlı bir qızı var. “Qaynanama da tapşırırdı, mənə də deyirdi ki, qızıma yaxşı baxın. Vətənpərvər idi. Həmişə qəhrəman hərbçilərimizi misal çəkib deyirdi ki, “gör necə gözəl oğullar var, vətənpərvərdirlər. Kaş, mənim də əlimə belə bir fürsət düşərdi”. O, şəhid olaraq bizim başımızı uca etdi, mən də qızını ona layiqli övlad kimi böyüdəcəyəm. Bu, mənim tək təsəllimdir”, - deyə şəhidin həyat yoldaşı Xuraman Ağamalıyeva söyləyir.
Ağəmməd Ağamalıyev Prezident İlham Əliyevin sərəncamlarına əsasən, ölümündən sonra “Vətən uğrunda”, "Füzulinin azad olunmasına görə", “Döyüşdə fərqlənməyə görə” medalları ilə təltif edilib.
