Salyanda rayon icra hakimiyyətinin, Yeni Azərbaycan Partiyası rayon təşkilatının və rayon məhkəməsinin birgə təşkilatçılığı ilə "Konstitusiya və Suverenlik İli" çərçivəsində "Ulu Öndər Heydər Əliyev ilk Milli Konstitusiyamızın memarı və məhkəmə-hüquq islahatlarının banisidir" mövzusunda tədbir keçirilib.
Tədbir Ümummilli Liderin və torpaqlarımızın azadlığı uğrunda canlarını fəda etmiş qəhrəman Vətən övladlarının xatirəsinin birdəqiqəlik sükutla yad edilməsi, Azərbaycan Respublikasının Dövlət Himninin səsləndirilməsi və mövzuya aid videoçarxın nümayişi ilə başlayıb.
Rayon məhkəməsinin hakimləri Rüstəm Alıyev və Vəsilə Əliyeva, rayon prokurorunun köməkçisi, I dərəcəli hüquqşünas Toğrul Əhədzadə, Şəkərli kənd ümumi orta ümumtəhsil məktəbinin direktoru, Əməkdar müəllim Səlimağa Səlimli və YAP Salyan rayon təşkilatının sədr müavini Aqşin Babayev çıxış edərək bildiriblər ki, Ulu Öndər müasir, hüquqi və demokratik Azərbaycanın banisidir. Heydər Əliyevin rəhbərliyi ilə qəbul edilən ilk Milli Konstitusiya dövlətimizin müstəqilliyinin və suverenliyinin möhkəmlənməsində, cəmiyyətin siyasi, iqtisadi və hüquqi əsaslarının formalaşmasında mühüm rol oynayıb. Qeyd olunub ki, 1995-ci ildə qəbul edilən Konstitusiya xalqımızın iradəsini əks etdirən, insan hüquq və azadlıqlarını təmin edən, dövlətin ali dəyərlərini qoruyan tarixi sənəddir.
Tədbirin sonunda rayon icra hakimiyyəti başçısının müavini Rəşad Cəbrayılov çıxış edərək vurğulayıb ki, bu gün Prezident İlham Əliyevin rəhbərliyi ilə Ulu Öndərin ideyaları uğurla davam etdirilir, hüquqi dövlət və vətəndaş cəmiyyəti prinsipləri möhkəmləndirilir, insan amilinə əsaslanan idarəçilik siyasəti ölkəmizin inkişafının əsasını təşkil edir. "Dövlət başçımızın qətiyyətli və uzaqgörən siyasəti nəticəsində Azərbaycan öz suverenliyini tam bərpa edib, torpaqlarını işğaldan azad edərək tarixi ədaləti təmin edib. 44 günlük Vətən müharibəsində qazanılan Zəfər və 2023-cü ildə həyata keçirilən 23 saatlıq antiterror tədbirləri Azərbaycanın gücünü, milli birliyini və Konstitusiyada təsbit olunmuş suverenlik prinsipinin real təcəssümünü nümayiş etdirib. "Konstitusiya və Suverenlik İli" çərçivəsində keçirilən bu kimi tədbirlər Ulu Öndər Heydər Əliyev irsinin öyrənilməsi, dövlətçilik ənənələrimizin təbliği və vətəndaşlarda hüquqi düşüncənin formalaşması baxımından mühüm əhəmiyyət daşıyır", - deyə R.Cəbrayılov çıxışını yekunlaşdırıb.
Seyran CAVADOV,
"Azərbaycan"
