Heyvandarlıqda bolluğa və ucuzluğa nail olmaq mümkündür
Aqrar sektorun ölkənin ərzaq təhlükəsizliyi baxımından mühüm əhəmiyyət kəsb edən sahələrinin, o cümlədən heyvandarlığın inkişafı xüsusi diqqət mərkəzindədir.
Son hədəfsə heyvandarlıq məhsullarına olan daxili tələbatı yerli istehsal hesabına ödəməkdir. O üzdən regionlarda heyvandarlıq müasir yanaşmalar əsasında inkişaf etdirilir.
Və bu işdən hökumət də yaxasını kənara çəkmir - bölgələrdə heyvandarlığın inkişafına hər cəhətdən böyük dəstək verir. Reallaşdırılan tədbirlər, xüsusən heyvandarlıqla məşğul olan fermerlərə güzəştli kreditlərin verilməsi sayəsində bu sahənin maddi-texniki bazası xeyli möhkəmlənib. Hazırda ölkənin ayrı-ayrı regionlarında heyvandarlıq profilli iri təsərrüfatlar fəaliyyət göstərir. Həmin təsərrüfatlar və ümumilikdə həyata keçirilən davamlı və sistemli islahatlar sayəsində heyvandarlıq məhsulları ilə daxili bazarın təminatında artım müşahidə olunur. Rayonlarda əhalinin bu sahə üzrə məşğulluğu və gəlir əldə etmək imkanları da artır.
Bütün bu proseslərdən Şabran da kənarda qalmayıb. Son məlumata görə, rayonda 25 min başdan çox qaramal, 49 min baş qoyun və keçi mövcuddur. Rayon üzrə 96 min sentnerdən çox ət (diri çəkidə), 100,6 sentnerdən çox süd (fiziki çəkidə) istehsal edilib.
Şabran fermerlərinin heyvandarlıq sahəsindəki təcrübəsi illərə söykənir. Bu təcrübədən yetərincə faydalanan Elşən Səfərəliyev, Əzməmməd Nadirov, Aqil Məlikov və digər fermerlər heyvandarlıqda uğurlar qazanıblar. Onlar vaxtaşırı cins damazlıq heyvan götürmək üçün müraciət edirlər. Ümumiyyətlə, indiyədək rayon Aqrar İnkişaf Mərkəzinə fermerlərdən heyvandarlıqla bağlı yüzlərlə müraciət daxil olub. Bu müraciətlər hesabına keçən il 208 baş inəkdə süni mayalanma aparılıb və əvvəlki dövrlərdə aparılmış süni mayalanmalar nəticəsində 226 baş buzov doğulub.
Rayon Aqrar İnkişaf Mərkəzinin numayəndələri tez-tez heyvandarlıq təsərrüfatlarında olur, heyvanların saxlanma və onlara qulluq şəraiti ilə maraqlanırlar. Belə baxış Rəhimli kəndində də keçirilib. Heyvandarlıq sektorunun əməkdaşı tərəfindən damazlıq cins heyvan götürülməsi ilə bağlı fermerin müraciətinə əsasən, onun kənddəki təsərrüfatına baxış keçirilərək akt və rəy tərtib olunub. Yeri gəlmişkən, qeyd edək ki, mərkəzin heyvandarlıq sektorunun əməkdaşları Şabran rayonu ərazisində quduzluq xəstəliyi əleyhinə vəhşi ətyeyən heyvanlarda və sahibsiz itlərdə oral immunizasiya məqsədilə "Rabadrop" peyvəndinin aldadıcı yemə qatılaraq əraziyə atılmasında da iştirak ediblər.
Ölkədə vaxtaşırı keçirilən yarmarkalarda iştirak edən Şabran heyvandarları ətin qiymətinin günbəgün artmasından narahatdırlar. Deyirlər ki, bahalaşmanın obyektiv və subyektiv səbəbləri var. Ona görə də qiymət artımının qarşısını almaq üçün hökumətlə heyvandarlar birgə tədbir görməlidirlər. Belə tədbirlər görülərsə, subyektiv səbəblər, məsələn, örüş sahələrinin, yem bazasının az olması, su qıtlığı kimi problemləri aradan qaldırmaq mümkündür. Süni mayalanma üzrə mütəxəssislərin çatışmazlığını da aradan qaldırmaq olar. Götürək Şabranı. Digər rayonlardan gələn süni mayalanma mütəxəssisləri yolun uzaqlığı ilə bağlı ödənişi artırırlar ki, bu da fermerlərə sərf etmir.
Ümumiyyətlə, Şabranda vəziyyətdən çıxış yolunu zəbt olunmuş örüş sahələrinin yenidən dövriyyəyə qaytarılmasında, artezian quyularının qazılmasında, sututarların yaradılmasında görürlər. Məhsuldarlığın artırılması və damazlıq işinin səmərəli təşkili, yemləmə və saxlanılma şəraitinin modern tələblər səviyyəsində təşkil edilməsi, müasir komplekslərin yaradılması və təbii ki, süni mayalanma mütəxəssislərinin sayının artırılması da şabranlı heyvandarların arzusudur. Söz düşmüşkən, mütəxəssislər Göygöl Süni Mayalanma Mərkəzinə iki namizədin məlumatını göndəriblər, həmçinin Heyvan Sağlamlıq və Baytarlıq Xidmətləri İdarəsinin əməkdaşlarının bu işə cəlb olunmasını təklif ediblər.
Akif ƏLİYEV,
"Azərbaycan"
jpeg_1766151155.jpeg)
