Son illər Cənubi Qafqaz əsas Trans-Avrasiya nəqliyyat marşrutlarının formalaşmasında və fəaliyyətində mühüm rol oynayan strateji məkana çevrilməkdədir. Əgər 10 il əvvəl bölgənin beynəlxalq nəqliyyat dəhlizləri baxımından əhəmiyyəti daha çox uzaq perspektiv kimi qiymətləndirilirdisə, bu gün bu, artıq reallığa çevrilib. Coğrafi mövqeyin verdiyi üstünlükləri qiymətləndirməyi bacaran Azərbaycan bunun nəticəsi kimi vaxtında Şimal–Cənub beynəlxalq multimodal nəqliyyat dəhlizinə qoşulub. Hazırda isə bu layihədə əsas və həlledici rol oynayır.
Bu sözləri AZƏRTAC-a açıqlamasında rusiyalı politoloq Vitaliy Arkov səsləndirib.
Arkovun sözlərinə görə, Azərbaycanın genişmiqyaslı nəqliyyat və logistika layihələrində fəal iştirakı ölkə rəhbərliyinin uzaqgörən və strateji qərarının göstəricisidir.
“Bu, çox müdrik addımdır. Qlobal ticarətin dinamik şəkildə artdığı bir şəraitdə yüklərin tranziti üçün geniş infrastruktur imkanlarının yaradılması iqtisadi baxımdan böyük gəlir mənbəyi hesab olunur. Bununla yanaşı, Azərbaycan təkcə tranzit ölkə deyil, o, hasil etdiyi, yetişdirdiyi və istehsal etdiyi məhsullarla dünya bazarına ciddi təkliflər verə bilir. Bu isə ölkə iqtisadiyyatının digər sahələrinin də inkişafına mühüm təkan verir”, – deyə ekspert vurğulayıb.
Ermənistanın nəqliyyat-logistika baxımından perspektivlərinə toxunan ekspert bildirib ki, Azərbaycanla ərazi mübahisəsinin həllindən və qarşılıqlı mehriban qonşuluq münasibətlərinə qayıdışından sonra bu ölkənin də böyük logistika layihələrində iştirak imkanları haqqında danışmaq mümkündür.
“Ermənistanın mövcud infrastrukturu hələ ilkin mərhələdə olsa da, düzgün yanaşma ilə o, yalnız Rusiya–İran və ya Gürcüstan–İran tranzit marşrutlarında deyil, daha geniş istiqamətlərdə də istifadə oluna bilər”, – deyə Vitaliy Arkov qeyd edib.
O, həmçinin deyib ki, Ermənistanı “Şimal–Cənub” Beynəlxalq Nəqliyyat Dəhlizində Azərbaycanla rəqib və ya alternativ kimi dəyərləndirmək doğru olmaz.
“Region ölkələri arasında münasibətlərdə hipotetik gərginliklərin yaranması halında belə siyasi fikir ayrılıqları iqtisadi əməkdaşlığa təsir göstərməməlidir. Hamı yaxşı başa düşür ki, diplomatik fikir ayrılıqları keçicidir, lakin illərlə formalaşan, milyardlarla investisiya qoyulmuş iqtisadi əlaqələr uzunmüddətli dəyər daşıyır. Onları dayandırdıqdan sonra eyni səviyyədə yenidən qurmaq asan deyil”, – deyə rusiyalı politoloq bildirib.
jpg_1765800994.jpg)
jpg_1765800788.jpg)
