Ermənistanda kilsə təxribat yuvasına çevrilib

Ermənistanda Nikol Paşinyan hakimiyyətinin siyasətinə qarşı çıxan sabiq iqtidar təmsilçiləri yenidən qarşıdurma yaratmaqla ölkədə növbəti xaos formalaşdırmaq məqsədi güdürlər. Belə ki,  son günlərdə Azərbaycanla sülh müqaviləsinin imzalanması ilə bağlı gedən müzakirələr fonunda keçmiş hərbi xuntanın revanş istəyi vəziyyətin daha da qarışacağını göstərir. 
Proseslər göstərir ki, keçmiş hərbi xunta yaranmış vəziyyətdən istifadə edərək kilsəni də siyasi proseslərə qataraq ölkədəki xaosu daha da dərinləşdirməyə çalışır. Bütün bunların fonunda Ermənistanda kilsə və hakimiyyətin qarşıdurması açıq müstəviyə keçir. Bu qarşıdurmada əsas motiv göründüyü kimi Qarabağ məsələsidir. 
Əsas revanşistlərdən olan bütün ermənilərin katolikosu II Qaregin Azərbaycana qarşı yenidən ərazi iddiaları səsləndirərək Eçmiədzin kilsəsinin Ermənistanda davam edən revanşizmin əsas ideoloqu olduğunu təsdiqlədi. O, 2 sentyabr "müstəqillik" mesajında  kimliklərini qoruduğunu və müharibənin fəlakətli nəticələrinə baxmayaraq, öz milli arzularını həyata keçirməyə çalışacaqlarını bildirib. Kilsənin erməni terroru və iddialarında əsas rol oynadığını nəzərə alsaq, Qareginin çağırışının Azərbaycan-Ermənistan sülh danışıqlarına ciddi problem yarada biləcəyi görünür. Paşinyan hakimiyyəti Qareginin mövqeyini qəbul etməsə də, kilsənin bu çağırışı erməni revanşizminin davam edəcəyindən xəbər verir. 
"Hraparak" nəşrinin yazdığına görə isə, Surp Anna deyilən kilsədə keşiş Baqratın çağırışı ilə toplaşmış haylar "Artsax günü" ilə bağlı növbəti yas tədbirində iştirak edib və həmin kilsəni özlərinin baş qərargahı kimi tanımağı qərara alıblar. Keşiş Baqrat deyib ki, əgər hakimiyyət buraya nə vaxtsa axtarış üçün polis, yaxud təhlükəsizlik xidməti əməkdaşı göndərərsə, müqəddəs məkan çirklənmiş olacaq. Sırf dini xurafat nümunəsi olan bu fikir artıq mətbuatda da yayılmağa başlayıb. Göründüyü kimi, ermənilərin müqəddəs Anna adlandırdıqları bu dini məkan da çoxdan terror, təxribat yuvasına çevrilib.
Son günlərdə İrəvanda xalqı Paşinyana qarşı qaldıranlardan, səsləndirdiyi fikirlərlə, açıqlamaları ilə yerli medianın diqqət mərkəzində yer alanlardan biri də sabiq baş nazir Qrant Baqratyandır. O da Ermənistanı növbəti vətəndaş qarşıdurmasına sürükləməyə çalışır. Məqsəd isə hakimiyyətlə xalq arasında uçurumu daha da dərinləşdirməkdir. Baqratyan erməni diasporunun siyasətdəki ən ciddi fiqurlarından biridir. O, sülh prosesinin və Ermənistan - Türkiyə əlaqələrinin bərpasına qarşı sərt müxalif mövqe ortaya qoyur. 
Sosial şəbəkələrdə paylaşımlara görə, müxalifət düşərgəsində həbslərin aparılması planlaşdırılır və qeyd olunur ki, kütləvi etiraz aksiyalarının qarşısını almaq üçün hakimiyyət indidən xüsusi plan hazırlayıb. Buraya müxalifət fəallarına qarşı güc tətbiq edilməsindən tutmuş, onların mitinq keçiriləcək ünvana daxil olmazdan əvvəl müvəqqəti həbsinə kimi müxtəlif planlar daxildir. O da vurğulanır ki, bu işdə təkcə polis yox, digər güc strukturlarının və hakimiyyətin nəzarətində olan xüsusi cəza dəstələrinin nümayəndələri də iştirak edəcəklər. Müxalifət isə hakimiyyət tərəfindən yaradılacaq bütün maneələrə rəğmən etiraz mitinqlərinin keçiriləcəyini bildirib. 
Beləliklə, müxalifət İrəvanda etirazlara başlayacağını bəyan etməklə bu yoldan dönməyəcəklərini bildirir.  Paşinyan isə ona qarşı yönəlmiş təhdidləri güc yolu ilə aradan qaldırmağı düşünür. Bu isə o deməkdir ki, Ermənistanı qarşıdakı dövr ərzində qanlı günlər gözləyir.

Elçin CƏFƏROV,
"Azərbaycan"