Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Dialoq və İnkişaf Naminə” İctimai Birliyi tərəfindən həyata keçirilən “Qərbi Azərbaycan–Qədim Yurd” layihəsi çərçivəsində yekun tədbir təşkil olunub.
Bu barədə AZƏRTAC-a İctimai Birlikdən məlumat verilib.
Bildirilib ki, tədbir Şəmkir şəhərində yerləşən Əhməd Cavad adına rayon Mədəniyyət Mərkəzində təşkil edilib.
Tədbirdə Dövlət Himni səsləndirilib, Ümummilli Lider Heydər Əliyevin və Vətən uğrunda canından keçən şəhidlərin xatirəsi bir dəqiqəlik sükutla yad edilib.
“Dialoq və İnkişaf Naminə” İctimai Birliyinin sədri Çingiz Bayramov çıxış edərək layihənin məqsədləri, görülən işlər və əldə olunan nəticələr barədə məlumat verib. O bildirib ki, bu gün Qərbi azərbaycanlıların səsi beynəlxalq platformalarda eşidilməkdədir və bu nailiyyət Prezident İlham Əliyevin qətiyyətli siyasi iradəsi, eləcə də xalqın birliyinin nəticəsidir.
“Qərbi Azərbaycan məsələsi yalnız tarixi keçmişimizə aid xatirə deyil, eyni zamanda gələcəyin çağırışıdır. Bu layihə vasitəsilə biz milli yaddaşımızı qoruyur və gələcək nəsillərə tarixi ədalətin bərpa olunacağına dair inam aşılayırıq”, – deyə Çingiz Bayramov vurğulayıb.
Tədbirdə layihənin eksperti, birliyin idarə heyətinin üzvü Anar Əsədov çıxış edərək bildirib ki, Qərbi Azərbaycandan zorla köçürülmüş soydaşlarımızın tarixi yurdlarına dinc yolla qayıdışı bu gün dövlət siyasətinin prioritet istiqamətlərindən birinə çevrilib. Bu kontekstdə “Qərbi Azərbaycana Qayıdış Konsepsiyası”nın əhəmiyyəti xüsusi qeyd olunub.
“Bu məsələ yalnız tarixi ədalətin bərpası deyil, həm də milli kimliyimizin qorunması məsələsidir. Bu istiqamətdə dövlət orqanları ilə yanaşı, vətəndaş cəmiyyəti və xüsusilə gənclər birgə fəaliyyət göstərməlidir”, – deyə Anar Əsədov bildirib.
Daha sonra tədbirdə çıxış edən icmanın Şəmkir rayonu üzrə rəhbəri Altay Qafarov və Qərbi Azərbaycandan olan Rəfiqə Mürsəlova da xatirələrini bölüşərək, layihənin əhəmiyyətinə toxunublar.
