Qazax rayonunda 2026-cı ilin məhsulu üçün aparılan səpin işləri və payız suvarması ilə bağlı görülən işlər müzakirə edilmişdir.
Tədbirdə rayon icra hakimiyyətinin başçısı Rəcəb Babaşov çıxış edərək keçirilən müşavirənin əhəmiyyətindən danışmış, qeyri-neft sektorunun inkişafı, kənd təsərrüfatında məşğulluğun artırılması, vətəndaşların rifah halının yaxşılaşdırılmasının dövlət siyasətinin prioritet sahələrindən olduğunu diqqətə çatdırmışdır. Ölkədə kənd təsərrüfatının inkişafı istiqamətində həyata keçirilən islahatların müsbət nəticələr verdiyini deyən R.Babaşov kənd təsərrüfatının inkişafının ölkənin ərzaq təhlükəsizliyinin təmin edilməsində aparıcı rola malik olduğunu vurğulamışdır: "Odur ki, Qazax rayonunda da aqrar sektorun inkişafına böyük diqqət və qayğı göstərilir. Bunun nəticəsidir ki, rayonda əkin sahələri son illər bir neçə dəfə artmış, məhsuldarlıq xeyli yüksəlmişdir".
RİH-in başçısı əkin sahələrinin vaxtında suvarılması, əkinçilərin suvarma suyu ilə təmin olunması üçün hər il olduğu kimi, bu il də qabaqlayıcı tədbirlərin görüldüyünü diqqətə çatdıraraq demişdir ki, rayonda əkin sahələrinin vaxtında suvarılması, fermerlərin suvarma suyundan korluq çəkməmələri üçün sudan qənaətlə istifadə edilməsinə diqqətlə yanaşılır.
Sonra Qazax Dövlət Aqrar İnkişaf Mərkəzinin direktoru Elxan Vəkilov çıxış etmişdir. Məlumat vermişdir ki, 2026-cı ilin məhsulu üçün 6800 hektarı arpa, 4700 hektarı buğda olmaqla, 11500 hektarda taxıl səpini nəzərdə tutulmuşdur. Son məlumata görə, 5480 hektarda arpa, 4160 hektarda buğda, ümumilikdə 9640 hektardas səpin aparılmışdır.
Bitki Mühafizəsi İdarəsinin rəisi Faiq Bəkirov isə bildirmişdir ki, indiyəcən 133,3 hektarda zərərvericilərə qarşı kimyəvi mübarizə işləri aparılmışdır. 8 kənddə, o cümlədən İkinci Şıxlı, Birinci Şıxlı, Yuxarı Salahlı və Aslanbəylidə 28,30 hektarda qəhvəyi mərmər bağacığına qarşı kimyəvi mübarizə tədbirləri görülmüşdür.
Müşavirədə aqrar sektorla əlaqəli olan idarə və təşkilatlara tapşırıqlar verilmiş, nöqsanların tezliklə aradan qaldırılması üçün bütün imkanlardan maksimum istifadə edilməsinin vacibliyi diqqətə çatdırılmışdır.
Sabir ƏLİYEV,
"Azərbaycan"
