ATƏT Parlament Assambleyasının qış sessiyası Avstriyanın paytaxtı Vyana şəhərində öz işinə başlayıb. Sessiya çərçivəsində ATƏT məkanında sülh, təhlükəsizlik və əməkdaşlıq sahəsində müzakirələr keçirilir. Milli Məclisin nümayəndə heyəti də sessiyanın işində iştirak edir.
AZƏRTAC xəbər verir ki, nümayəndə heyətinin rəhbəri Qaya Məmmədov “Ukraynada və onun hüdudlarından kənarda Helsinki prinsipləri uğrunda mübarizə: müfəssəl təhlükəsizlik əsasında regional sülhün təmin edilməsi” mövzusunda keçirilən debatda çıxış edib.
Q.Məmmədov Helsinki Yekun Aktının əhəmiyyətini vurğulayaraq bildirib ki, suverenlik, ərazi bütövlüyü və beynəlxalq səviyyədə tanınmış sərhədlərin toxunulmazlığı prinsipləri ardıcıl və ikili standartlara yol verilmədən qorunmalıdır. Bu prinsiplərin selektiv şəkildə tətbiqinin ATƏT məkanında hərtərəfli təhlükəsizliyi sarsıtdığını bildirən deputat deyib: “Ukraynada davam edən müharibə regional və qlobal sabitlik üçün ciddi çağırış olaraq qalır. Biz Ukraynanın ərazi bütövlüyünə və suverenliyinə möhkəm dəstəyimizi bir daha bildiririk. Ukraynaya humanitar yardım göstərməklə praktiki dəstəyimizi davam etdiririk.
Ermənistan və Azərbaycan arasında baş verən müsbət proseslər sülhün mümkün olduğunu göstərir. 2025-ci ilin avqust ayında keçirilmiş Vaşinqton Sülh Sammiti Azərbaycan ilə Ermənistan arasında münasibətlərin normallaşmasında tarixi dönüş nöqtəsi oldu. Amerika Birləşmiş Ştatlarının, xüsusilə də sülh prosesinin möhkəmləndirilməsinə töhfə vermiş Prezident Trampın konstruktiv rolunu yüksək qiymətləndiririk. ABŞ-nin Vitse-prezidenti Cey. Di. Vensin Azərbaycana və Ermənistana son səfəri ABŞ-nin regionumuzda sülhə, bağlantılara və inkişafa davamlı sadiqliyinin güclü siqnalı oldu.
Bu gün isə Azərbaycan və Ermənistan faktiki olaraq sülh şəraitində yaşayır. Sülh hər iki ölkəyə daha çevik xarici siyasət yürütməyə və xalqlarının rifahı naminə əməkdaşlığın istifadə olunmamış potensialından yararlanmağa imkan verir. Birbaşa ikitərəfli danışıqların ən səmərəli irəliləyiş yolu olduğu sübut edilib. Hökumətlər, parlamentlər və vətəndaş cəmiyyəti arasında müntəzəm təmaslar mövcuddur. Ticarət və tranzit sahəsində real əməkdaşlıq formalaşır. Bu dinamikanı qorumaq üçün maneələrin tam aradan qaldırılması və öhdəliklərin tam icrası zəruridir. Bu baxımdan, TRIPP-in vaxtında reallaşdırılması sülh prosesinin düzgün istiqamətdə davam etməsi üçün həyati əhəmiyyət daşıyır”.
Q.Məmmədov ATƏT-in müfəssəl təhlükəsizlik konsepsiyasının aktual və zəruri olduğunu qeyd edərək, səhvlərdən nəticə çıxarmağın, konsensus prinsipinin və əməli nəticələrə yönələn fəaliyyətin əhəmiyyətini vurğulayıb.
jPG_1771534172.jPG)
