“Azərbaycan” qəzetinin 27 noyabr 2021-ci il tarixli sayında dərc edilmiş “Ticarət həm də mədəniyyətdir” sərlövhəli  məqalədə qaldırılmış problemin həlli istiqamətində tədbirlərin görülməsi ilə bağlı məktubunuza Azərbaycan Respublikasının Qida Təhlükəsizliyi Agentliyində aidiyyəti üzrə baxılmışdır.

Nəzərinizə çatdırırıq ki, məqalədə qeyd olunan Bakı şəhəri Yasamal rayonu, Ələsgər Ələkbərov küçəsində səkinin ortasında meyvə-tərəvəz, təzə balıq və digər qida məhsullarının satılması faktı ilə bağlı agentliyin əməkdaşları tərəfindən müvafiq araşdırma aparılmış və qeyd olunan məsələnin küçə ticarətinə aid olduğu müəyyən edilmişdir.

Belə ki, Azərbaycan Respublikası İnzibati Xətalar Məcəlləsinin 454-cü maddəsinə əsasən, qanunsuz küçə ticarəti, yəni müvafiq icra hakimiyyəti orqanı tərəfindən müəyyən edilməmiş yerlərdə malların satılmasına və ya işlərin (xidmətlərin) görülməsinə görə inzibati cərimə nəzərdə tutulmuşdur. Eyni zamanda “Azərbaycan Respublikası İnzibati Xətalar Məcəlləsinin təsdiq edilməsi haqqında” Azərbaycan Respublikasının 2015-ci il 29 dekabr tarixli 96-VQ nömrəli qanununun tətbiqi barədə Azərbaycan Respublikası Prezidentinin 15 fevral 2016-cı il tarixli 795 nömrəli fərmanının 5.53-cü maddəsinə uyğun olaraq İnzibati Xətalar Məcəlləsinin 454-cü maddəsində nəzərdə tutulmuş inzibati xətalar haqqında işlər üzrə inzibati icraata Azərbaycan Respublikasının Daxili İşlər Nazirliyi və ya Azərbaycan Respublikasının yerli icra hakimiyyəti orqanları baxır.

Qeyd olunanları nəzərə alaraq, sözügedən ünvanda inzibati xətaya yol vermiş şəxs(lər) barəsində inzibati xəta haqqında iş üzrə icraata başlanması və qanunsuz küçə ticarətinin qarşısının alınması üçün zəruri tədbirlərin görülməsi məqsədilə müvafiq məktublar Yasamal Rayon İcra Hakimiyyətinə və Yasamal Rayon Polis İdarəsinə göndərilmişdir.

Balarəhim QULİYEV,

Azərbaycan Respublikasının Qida Təhlükəsizliyi Agentliyinin sədr müavini