Sena çayında üzən atletlərin əksəriyyətinin halı pisləşib

Paris Olimpiadası başlayandan bəri hələ qalmaqal yaşanmayan gün olmayıb. Olimpiya Oyunlarının yumşaq desək, çox qəribə, əslində isə biabırçı açılışı ilə bağlı ehtiraslar səngiməmiş yeni xoşagəlməz hadisələr baş verməkdə davam edir.

Məsələn, Britaniya komandası qida çatışmazlığı və keyfiyyətsiz yemək səbəbindən Olimpiadaya öz aşpazını gətirir. Pedofiliyaya görə məhkum olunmuş idmançı Olimpiadaya vəsiqə əldə edir və ən mötəbər yarışların iştirakçısına çevrilir. Daha güclü yumruqları olan iki transseksual döyüşçü qadın boksçulara qarşı rinqə çıxır...

Oğurluq, soyğunçuluq və təcavüz halları da Olimpiya Oyunlarının bir növ ayrılmaz tərkib hissəsinə çevrilib.

Fransa paytaxtında axan məşhur Sena çayının bulanıq suları mövzusu isə son zamanların dillər əzbəridir. Və budur, həmin mövzuda daha bir xoşagəlməz xəbər: Sena çayında triatlon növünə daxil olan üzgüçülük yarışı keçirildikdən sonra idmançıların halı pisləşib. Bəzi atlerlərdə qusma əmələ gəlib və bütün bu hallar canlı yayımda göstərilib.

Kanada komandasının nümayəndəsi Tayler Mislavçuk ən azı 10 dəfə qusduğunu bildirib. Bəziləri, məsələn qazaxıstanlı triatlonçu Yekaterina Şabalina hətta yarışı tərk etməli olublar.

Bundan əvvəl suyun keyfiyyətinin aşağı olması səbəbindən yarış bir gün təxirə salınmışdı, lakin 24 saat ərzində həyat üçün təhlükəli bakteriyaların aşıb-daşdığı Sena çayının sularının normal vəziyyətə düşməyəcəyi hamıya aydın idi.

 Hələ iki il öncə məlum idi ki, Parisin bütün çirkab sularının axıdıldığı Sena çayında üzmək sağlamlıq üçün təhlükəlidir. İdmançılar və ictimaiyyət həyəcan təbili çalırdı, lakin səlahiyyətlilər söz verirdilər ki, əsas şəhər arteriyası təmizlənəcək. Bunun üçün milyardlarla avro ayrılıb. İndi isə vəziyyət göz önündədir: həmin pulların hara xərcləndiyi bəlli deyil.

Bu hadisə bir daha nümayiş etdirir ki, Makron höküməti üçün idmançıların və ümumən insanların sağlamlığı məsələsi prioritet təşkil etmir. Bunu yarışlar zamanı  adi içməli suya möhtac qalan daha bir olimpiyaçı - amerikalı tennisçi Daniel Kollinz də  təsdiqləyib. O, Paris Olimpiadasındakı şəraitdən şikayətlənərək bildirib ki,  Fransada idmançıların sağlamlığı prioritet deyil.

Oyun zamanı sağlamlığında ciddi problemlər yaranan 30 yaşlı idmançı Olimpiada təşkilatçılarını kifayət qədər  soyuq su şüşələrinin olmamasında ittiham edib: "Kortdan çıxanda az qala huşumu itirdim, sonra üç saat tibbi masanın üstündə qalmışam. Bu, səhhətimə çox pis təsir etdi. Bütün bədən qıc olanda, günvurmadan əziyyət çəkəndə, çıxış etmək çox çətindir".

Qeyd edək ki, Daniel Kollinz Olimpiya tennis turnirinin 1/4 finalında İqa Sviateklə görüşünü məlum səbəblərdən başa vura bilməyib. O, üçüncü setdə kortu tərk etməyə məcbur olub.

Rizvan CƏFƏROV,

"Azərbaycan"