XI Bakı Beynəlxalq Kitab Sərgisi çərçivəsində “Özbəkistan–Azərbaycan: Qardaş xalqların mədəni-mənəvi əməkdaşlığının tarixi aspekti” monoqrafiyasının təqdimatı olub.
AZƏRTAC xəbər verir ki, kitab Azərbaycanın Özbəkistandakı səfirliyi nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin layihəsi əsasında hazırlanaraq nəşr edilib.
Monoqrafiyanın müəllifləri “Özbəkistan-Azərbaycan” Dostluq Cəmiyyətinin icraçı direktoru, tarix elmləri doktoru, Özbəkistanın Nizami adına Milli Pedaqoji Universitetinin professoru Erkin Nuriddinov və Özbəkistanda çalışan azərbaycanlı alim, tarix üzrə fəlsəfə doktoru Azər Adıgözəlovdur.
Bu nəşrdə rəsmi sənədlərə, arxiv materiallarına və konkret faktlara əsaslanaraq iki qardaş xalqın qədim zamanlardan bu günə qədər olan mədəni-mənəvi qarşılıqlı əlaqələr yolu təhlil edilir. Müəlliflər mədəni diplomatiyanın təşəkkül tapması məsələlərinə və Azərbaycan-Özbəkistan münasibətlərinin inkişafında Ümummilli Lider Heydər Əliyevin tarixi roluna xüsusi diqqət yetiriblər.
Təqdimatda çıxış edən Azərbaycan Mədəniyyət Mərkəzinin direktoru Akif Marifli monoqrafiyanın təkcə tarixi sənədlər toplusu deyil, həm də müasir həqiqətlərə işıq salan mühüm elmi mənbə olduğunu qeyd edib. Onun sözlərinə görə, kitabda Böyük İpək Yolu boyunca ticarət və mədəni əlaqələrdən müstəqillik illərində siyasi, iqtisadi və mədəni tərəfdaşlığın yeni mərhələsinə qədər geniş əməkdaşlıq panoraması təqdim olunub.
Direktor vurğulayıb ki, nəşr Azərbaycan və Özbəkistan xalqlarının birlik və həmrəyliyinin tarixi köklərini daha dərindən araşdırmaq istəyən gələcək nəsillər üçün bələdçi olacaq. Əlavə edib ki, bu cür əsərlər təkcə elmi dairələr deyil, həm də geniş ictimaiyyət üçün mühüm əhəmiyyət kəsb edir, ölkələr arasında dostluq körpülərinin möhkəmlənməsinə kömək edir.
Professor Erkin Nuriddinov çıxışında təşkilatçılara minnətdarlığını bildirib və monoqrafiyanın hazırlanmasında əsas məqsədləri açıqlayıb. Alimin sözlərinə görə, toplanmış materiallar Azərbaycan ilə Özbəkistan xalqları arasında çoxəsrlik dostluğu təkcə tarixi baxımdan deyil, həm də mədəniyyət, elm və təhsil sahələrində əməkdaşlığın konkret nümunələri ilə nümayiş etdirir. E.Nuriddinov monoqrafiyanın etibarlı elmi mənbəyə çevriləcəyini, iki dövlət arasında strateji tərəfdaşlığın daha da dərinləşməsinə töhfə verəcəyini qeyd edib.
