Onlar dövlətin qüruru, dövlət onların dayağıdır

Göygöldə şəhid ailələrinin və qazilərin heç bir müraciəti diqqətdən kənarda qalmır

Qarabağ Zəfərindən 5 ildən çox vaxt keçməsinə baxmayaraq, Azərbaycan xalqı həmin günləri bu gün də qürur hissi ilə xatırlayır. Bu, o tarixdir ki, başlanğıcını 27 sentyabrdan götürmüş və 10 noyabrda ordumuzun tam qələbəsi ilə başa çatmışdır. Silahlı Qüvvələrin Müzəffər Ali Baş Komandanı İlham Əliyevin rəhbərliyi altında ordumuz döyüş meydanında tarixi ədaləti bərpa etmişdir. 

İndi xalqımız haqlı olaraq həmin döyüşlərdə əsl vətənpərvərlik nümayiş etdirən qorxmaz, qeyrətli əsgər və zabitləri ilə fəxr edir, onların fədakarlığı qarşısında baş əyir. Bu yolda canlarını qurban verən, ağır döyüşlərdə sağlamlığını itirən igid oğullarımız isə heç vaxt unudulmur, daim yad edilərək gələcək nəsillərə nümunə göstərilir.

Şəhid ailələri, qazilər, eləcə də müharibə iştirakçılarına Göygöl rayonunda da diqqət və qayğı ilə yanaşılır. Onlarla keçirilən görüşlərdə qaldırdıqları məsələlərə biganə yanaşılmır. Qeyd edək ki, rayonda 105 şəhid, 136 müharibə əlili, 1897 nəfər müharibə iştirakçısı var. Rayon icra hakimiyyətində Vətən müharibəsi iştirakçıları və şəhid ailələri ilə işin təşkili şöbəsi yarandığı gündən şəhid ailələri, eləcə də müharibə əlilləri və veteranlarının qaldırdıqları problemlər qanunvericilikdə nəzərdə tutulmuş güzəşt və imtiyazlar çərçivəsində həll edilir. Əlillik dərəcəsinin təyin edilməsi, veteran adının və vəsiqənin verilməsi, şəhid adının əbədiləşdirilməsi, ad verilmiş küçələrdə abadlıq və quruculuq işlərinin aparılması, məişət şəraitinin yaxşılaşdırılması istiqamətində tədbirlər görülür. Bundan başqa, rayon rəhbərliyi şəhidlərin ailə üzvləri ilə görüşərək onların arzu və istəklərini dinləyir, qaldırılan məsələlərin həlli istiqamətində tədbirlər görür. Bu görüşlərdə dövlət başçısı İlham Əliyevin və Birinci vitse-prezident Mehriban xanım Əliyevanın qazilərə göstərdikləri xüsusi diqqət və qayğıdan danışılır, qazilərin sosial müdafiəsinin gücləndirilməsi və məşğulluq məsələlərinin həlli istiqamətində mühüm addımlar atıldığı vurğulanır.  

Vətən müharibəsi qələbə ilə başa çatdıqdan bu günəcən rayon ərazisində yaşayan şəhid ailələri və qazilərin ev tikintisi, sahibkarlıq fəaliyyəti, eləcə də xatirələrinin anılması məqsədilə bulaq komplekslərinin tikintisinə torpaq sahəsi ayrılması, mənzil və ya avtomobil növbəsinə götürülməsi, iş və ya özünüməşğulluq aktivləri ilə təmin edilməsi, maddi yardım verilməsi, tibbi-müalicə və dərman vasitələrinin alınması üçün etdikləri xahiş və müraciətləri diqqətdən kənarda qalmamışdır. Bundan başqa, təkcə son bir ildə rayon üzrə ümumilikdə 185 nəfər imtiyazlı şəxs mənzil növbəsinə alınmış, 67 nəfər daimi işlə təmin edilmişdir. Hazırda mənzil qeydiyyatında olan 67 nəfərin 33 nəfəri şəhid ailəsi, 32 nəfəri müharibə əlilidir. Keçən ilin dekabr ayınadək isə 29 şəhid ailəsi və 83 nəfər müharibə əlili mənzil və fərdi yaşayış evi ilə təmin olunmuşdur. 

Sabir ƏLİYEV,

"Azərbaycan"