Moskva isə İrəvana “Ukrayna ssenarisi”ni xatırladır
Yeni sorğuya görə, Ermənistanın Baş naziri Nikol Paşinyanın partiyası parlamentdə əhəmiyyətli çoxluq qazana bilər. Bu arada, Rusiya İrəvanın qərbyönümlü dönüşünə qarşı kampaniyasını gücləndirir və Ermənistan hakimiyyətinə "Ukrayna ssenarisi" barədə xəbərdarlıq edir.
Ermənistanda iyunun 7-də keçiriləcək həlledici seçkilərdən əvvəl təşkil olunmuş son sorğu göstərir ki, Baş nazir Nikol Paşinyanın “Vətəndaş müqaviləsi” partiyası səslərin təxminən 65 faizini qazana bilər və bu, qarşıdan gələn parlamentdə inandırıcı qələbə və əhəmiyyətli çoxluq vəd edir. Breavis təşkilatının 5-11 may tarixlərində 1551 respondent arasında apardığı sorğu göstərib ki, “Vətəndaş müqaviləsi” parçalanmış müxalifət üzərində rahat bir üstünlük əldə edəcək və qalan partiyaların heç biri 12 faizdən çox səs toplaya bilməyəcək, baxmayaraq ki, onlardan bəziləri Rusiya tərəfindən açıq şəkildə dəstəklənir.
Ekspertlər hesab edirlər ki, əgər gələn bazar günü keçiriləcək səsvermə bu proqnozları təsdiqləsə, ermənilər N.Paşinyana ölkənin strateji istiqamətini Avropa və qərbyönümlü kursa yönəltmək üçün həlledici mandat verəcək, onu Kremllə birbaşa qarşıdurma yoluna çıxaracaq və Qarabağla bağlı Azərbaycanla tarixi sülh müqaviləsini möhkəmləndirəcək, regional sabitliyi və əməkdaşlığı daha da təşviq edəcək. Breavis sorğusu həmçinin İrəvanın milli strategiyasının yenidən nəzərdən keçirilməsini və Rusiyanın postsovet orbitində onilliklərdən sonra Qərbə doğru daha da irəliləyişini göstərir.
Son həftələr Moskva İrəvana təzyiqi durmadan artıraraq kritik ticarət məhdudiyyətləri tətbiq edir və Ermənistanın Avrasiya İqtisadi İttifaqında (Aİİ) üzvlüyünü dayandırmaqla hədələyir. Rusiya Prezidenti Vladimir Putin isə amerikalı həmkarı Donald Trampın N.Paşinyana tam və hərtərəfli dəstəyini bildirməsindən bir neçə gün sonra Ermənistanla Ukrayna arasında paralellər aparıb.
Yeni sorğunun dərc olunması həmçinin Rusiyanın İrəvanın AI-yə üzvlüyünü sürətləndirmək qərarı ilə əlaqədar Ermənistandakı səfirini "məsləhətləşmələr üçün" geri çağırmaq qərarı ilə üst-üstə düşüb. Rusiya Xarici İşlər Nazirliyinin şənbə günü verdiyi açıqlamada deyilir: "Rusiya Federasiyasının Ermənistan Respublikasındakı səfiri S.P.Kopırkin Ermənistan rəhbərliyinin Avropa Ittifaqı ilə yaxınlaşma addımları ilə əlaqədar məsləhətləşmələr üçün Moskvaya geri çağırılıb".
Bir gün əvvəl isə Kreml iqtisadi xəbərdarlıqlar və tədbirlərlə hücumunu davam etdirərək Ermənistandan müəyyən meyvə və tərəvəzlərin ixracına müvəqqəti məhdudiyyətlər elan etmiş, Ermənistanın mineral suyu, şərabı və konyakına qoyulan son qadağalara əlavə olaraq, ölkə üçün həyati əhəmiyyət kəsb edən ucuz qaz və neft tədarükünün kəsilməsi ilə bağlı təhdidlər irəli sürmüşdü. Məlumat üçün bildirək ki, təxminən 3 milyon nəfər əhalisi olan Ermənistan ötən il qazının 80 faizdən çoxunu Rusiyadan idxal etmişdir.
Elə həmin gün Aİİ liderləri Ermənistanı Avropa İttifaqına qoşulmaq planlarının bütün üzv dövlətlərin iqtisadi təhlükəsizliyi üçün ciddi risklər yaratdığı barədə xəbərdar edən birgə bəyanat yayıblar. Astana sammiti zamanı Rusiya, Belarus, Qazaxıstan və Qırğızıstan liderləri İrəvanı Ermənistanın Aİ ilə Moskvanın rəhbərlik etdiyi blok arasında seçim etməsi ilə bağlı mümkün qədər tez bir zamanda milli referendum keçirməyə çağırıblar. Vadimir Putin isə Astanada keçirilən sammitdən sonra mətbuat konfransında "Ukraynadakı böhran Kiyevin Aİ-yə qoşulmaq cəhdləri ilə başladı" deyə yenidən Ukrayna ilə Ermənistan arasında paralellər aparıb.
Dünən Vladimir Putin Nikol Paşinyanı ad günü münasibətilə təbrik edib. Kreml saytında yerləşdirilən təbrik teleqramında Rusiya Prezidenti Moskva ilə İrəvan arasındakı münasibətlərin dostluq xarakterini qeyd etməklə yanaşı, onların davamlı mütərəqqi inkişafında maraqlı olduğunu vurğulayıb.
Rizvan CƏFƏROV,
“Azərbaycan”
