“Otuz ildən artıq davam edən münaqişədən sonra region tarixi dönüş nöqtəsinə çatıb.
AZƏRTAC xəbər verir ki, bu barədə Norveçin “Geopolitika” nəşrində Azərbaycanın İsveç, Finlandiya, Norveç və Danimarkadakı səfiri Zaur Əhmədovun Azərbaycanla Ermənistan arasında yekun sülh sazişinin perspektivlərinə həsr olunmuş məqaləsində bildirilib.
Diplomatın sözlərinə əsasən, tərəflər arasında artıq hərbi təhdid yoxdur və sülh sazişinin mətni razılaşdırılıb və paraflanmağa hazırdır.
Zaur Əhmədov bildirir ki, sənədin imzalanmasına əsas maneə Ermənistanın Konstitusiyasıdır. Bu sənəddə xüsusilə Qarabağa dair, Azərbaycanın ərazilərinə qarşı ərazi iddialarını əks etdirən müddəalar qalmaqdadır. Rəsmi Bakı həmin ifadələrin konstitusiyadan çıxarılmasını tələb edir və bunu etimadın bərpası və gələcəkdə münaqişələrin qarşısının alınması üçün zəruri şərt hesab edir.
Məqalədə ATƏT-in Minsk qrupu da tənqid olunur. Müəllifin fikrincə, bu mexanizm onilliklər ərzində yalnız status-kvonun qorunmasına xidmət edib və artıq mövcud siyasi reallıqları əks etdirmir. Müasir diplomatik proses vasitəçilərsiz, birbaşa dialoq əsasında qurulmalıdır — bu isə artıq həyata keçirilməkdədir.
Uzun illər davam edən işğal və dağıntılara baxmayaraq, Azərbaycan Ermənistandan kompensasiya tələb etmir. Əksinə, işğaldan azad olunmuş ərazilərin bərpasına, məcburi köçkünlərin qayıdışına və infrastrukturun qurulmasına fokuslanıb. Artıq 50 mindən çox azərbaycanlı Qarabağ və Şərqi Zəngəzura qayıdıb.
Müəllifin vurğuladığı əsas mövzulardan biri Zəngəzur dəhlizi layihəsidir. O, bu dəhlizin Azərbaycanın Naxçıvanla birləşməsinə, eləcə də Şərq-Qərb, Şimal-Cənub nəqliyyat əlaqələrinin güclənməsinə və regionun geniş geoiqtisadi arxitekturaya inteqrasiyasına töhfə verəcəyini qeyd edir.
Səfir məqaləsini Ermənistan rəhbərliyini siyasi iradə nümayiş etdirməyə, Konstitusiyanı dəyişməyə və keçmiş ərazi iddialarından əl çəkməyə çağırışla tamamlayır. Onun fikrincə, yalnız bu şərtlər yerinə yetirildikdən sonra Cənubi Qafqazda uzunmüddətli sülh və sabitliyə yol açacaq saziş imzalana bilər.
jpeg_1765897678.jpeg)
