Təşəbbüslərin reallaşdırılması yalnız fərdi səylər və ayrı-ayrı uğur hekayələri ilə məhdudlaşmamalıdır, bu proses böyük sistemlərə inteqrasiya edilməlidir.
AZƏRTAC xəbər verir ki, bu barədə Milli Məclisin deputatı, COP29-un İqlim dəyişmələri üzrə yüksəksəviyyəli çempionu Nigar Arpadarai “Azərbaycanın Günəş, dənizdə külək, mavi və yaşıl hidrogen sahəsində potensialının araşdırılması” adlı paneldə çıxışı zamanı deyib.
Nigar Arpadarai qeyd edib ki, enerji, qida, su və infrastruktur sahələrində dəyişikliklərin həyata keçirilməsi insanların gündəlik həyatında nəticələri hiss etməsinə imkan verir: “Əgər biz real yerlərdə, real çətinliklər qarşısında irəliləyiş əldə etmək istəyiriksə, beynəlxalq əməkdaşlıq yalnız söz olaraq qalmamalı, praktiki nəticələr verməlidir”.
O bildirib ki, zəruri koordinasiya birləşəndə ən çətin problemlərin belə həllinə nail olmaq mümkündür: “Böyük fəlakətlər zamanı gördüyümüz kimi, birlikdə daha sürətli hərəkət edəndə etimad yaranır və mürəkkəb problemlər həll olunur. Bu gün həmin həmrəylik ruhunu iqlim sahəsində də görürük – yeni ittifaqlarda, ortaq bilikdə və yerli liderlikdə”.
Nigar Arpadarai Azərbaycanın regional təşəbbüslərdə lider rolunu xüsusi vurğulayıb. “Nazir Pərviz Şahbazovun qeyd etdiyi “Yaşıl Enerji Dəhlizi” protokolunun Gürcüstan, Rumıniya, Macarıstan və Azərbaycanı birləşdirməsi mühüm əməkdaşlıq nümunəsi kimi təqdim olunub. Bu təşəbbüsün təkcə region deyil, həm də Mərkəzi Asiya və qlobal enerji bazarı üçün əhəmiyyət kəsb etdiyi bildirilib”.
Onun sözlərinə görə, bu layihələr sadəcə infrastruktur deyil, həm də etimad, ortaq vizyon və qətiyyətin ifadəsidir. Onlar yalnız enerji paytaxtları yaratmır, həm də dayanıqlılıq və əməkdaşlıq icmaları formalaşdırır.Çıxışında “Açıq Fəaliyyət Gündəliyi”nin əhəmiyyətinə də toxunan Nigar Arpadarai diqqətə çatdırıb ki, bu platforma Paris Sazişinin məqsədləri ilə yanaşı, yerli icmaları və şirkətləri iqlim proseslərinin mərkəzinə cəlb edir, irəliləyişləri, boşluqları və gələcək addımları nümayiş etdirir. COP30-a hazırlıq çərçivəsində dörd əsas təşəbbüsün işə salındığını bildirən Nigar Arpadarai qeyd edib ki, enerji, qida, maliyyə və dayanıqlılıq sahələrində artıq mövcud koalisiyalarla birgə məqsədlərin reallaşdırılması istiqamətində addımlar atılır:“İnstitusional dayanıqlılıq, insan kapitalına, texnologiyalara və materiallara sərmayə qoyuluşu xüsusilə enerji sektorunda mühüm əhəmiyyət daşıyır. Çünki əlçatan, etibarlı və bərpaolunan enerji yalnız iqlim həlli deyil, həm də inkişaf, ictimai sağlamlıq, iqtisadi imkan və innovasiya üçün əsasdır”.
Nigar Arpadarai Bakıdakı müzakirələrin davamlı nəticələrə çevrilməsinin vacibliyini qeyd edib. “Biz bilirik nə lazımdır, kimlər hərəkətə keçməlidir. İndi əsas məsələ necə və hansı sürətlə addım atmaqdır”, - deyə o vurğulayıb.
jpg_1763916860.jpg)
jpg_1763620972.jpg)
