Çin Azərbaycanın ən böyük tərəfdaşlarından biridir və hər ötən il iki ölkə arasında əlaqələr daha da dərinləşir. Azərbaycan və Çin arasında iqtisadi əməkdaşlığın mühüm istiqamətlərindən biri Orta dəhlizin inkişafı ilə bağlıdır. Avropa ilə Asiyanı birləşdirən bu mühüm nəqliyyat marşrutu yüklərin təhlükəsiz və sürətli daşınması baxımından böyük əhəmiyyətə malikdir. Çinin "Bir kəmər, bir yol" təşəbbüsünün əsas komponentlərindən biri olan dəhliz Pekin və Bakı arasında əlaqələrin inkişafına daha da təkan verir.
"Şərq-Qərb" Beynəlxalq Nəqliyyat Dəhlizinin tərkib hissəsi olan Orta dəhliz yalnız nəqliyyat marşrutu deyil, iki qitə arasında iqtisadi və geosiyasi əməkdaşlığı gücləndirən strateji platformadır. Bu baxımdan nəqliyyat marşrutunun keçdiyi ölkələrdən biri kimi Azərbaycanla əlaqələrin genişləndirilməsi Çin üçün də vacibdir.
Azərbaycan Orta dəhlizin inkişafı istiqamətində bir sıra mühüm nəqliyyat və logistika layihələri həyata keçirib. Müasir nəqliyyat infrastrukturunun qurulması, logistika mərkəzlərinin modernləşdirilməsi, gömrük və sərhəd prosedurlarının rəqəmsallaşdırılması marşrutun rəqabət qabiliyyətini gücləndirib. Bütün bunları nəzərə alaraq Azərbaycan bu gün yalnız dəhlizin tranzit ölkəsi deyil, beynəlxalq nəqliyyat marşrutunun inkişafını təşviq edən, regional əməkdaşlığı gücləndirən strateji tərəfdaşdır. Bu isə Çin, Mərkəzi Asiya və Avropa arasında ticarət əlaqələrinin genişlənməsinə mühüm töhfə verir.
Milli Məclisin deputatı Vüqar BAYRAMOV mövzu ilə əlaqədar qəzetimizə açıqlamasında deyib ki, Prezident İlham Əliyev IV Şuşa Qlobal Media Forumunda çıxışı zamanı bir sıra strateji istiqamətlərə toxunub və bunlardan biri də Orta dəhlizin imkanlarının genişləndirilməsi, bu kontekstdən Çin Xalq Respublikası ilə əməkdaşlıq idi: "Azərbaycan Orta dəhlizin infrastrukturunun genişlənməsinə töhfə verən ölkələrdəndir. Bir tərəfdən Ələt ticarət limanının ötürmə qabiliyyəti 15 milyon tondan 25 milyon tona qədər yüksələcək. Bu da, təbii ki, Azərbaycan üzərindən daha çox yükün daşınmasına imkan verəcək. Digər tərəfdən, Zəngəzur dəhlizinin (TRIPP) istifadəyə verilməsi və onun "Şərq-Qərb", bütövlükdə Orta dəhlizə inteqrasiyası da region üzərindən daha çox yükün daşınmasına şərait yaradacaq".
Bu baxımdan Azərbaycan-Çin münasibətlərinin kifayət qədər strateji və vacib olduğunu qeyd edən deputat əlavə edib ki, iki ölkə strateji tərəfdaşdır və bütün bunlar çox fərqli sahələrdə əməkdaşlığın inkişafına imkan verir. "Artıq bir ildən çoxdur ki, Azərbaycan və Çin vətəndaşları üçün vizasız rejim tətbiq olunub. Bu, ölkələr arasında turizm və biznesin inkişafına xüsusi təkan verir. Eyni zamanda Çin Azərbaycanın ən böyük üç tərəfdaşından biridir, hətta son statistikada Çin ikinci ən böyük ticarət tərəfdaşına çevrilib. Pekinlə Bakı arasında strateji tərəfdaşlıq həm də iki ölkə arasında ticarət dövriyyəsinə təsir göstərir və artımlar müşahidə olunur", - deyə o bildirib.
V.Bayramov vurğulayıb ki, Azərbaycan və Çin arasında nəqliyyat və logistika sahəsindəki əməkdaşlıq strateji baxımdan ölkələr arasında münasibətlərin daha da dərinləşməsinə xidmət edəcək.
Əsmər QARDAŞXANOVA,
"Azərbaycan"
