Aprelin 6-da və 7-də Ağdam, Cəbrayıl rayonlarında mina partlayışlarının baş verməsinə, nəticədə bir hərbçimizin həlak olmasına, dörd mülki şəxsin, o cümlədən azyaşlı uşaqların bədən xəsarətləri almasına müxtəlif ölkələrdə yaşayan Azərbaycan diasporu biganə qalmayıb, xarici instansiyalara etiraz məktubu ünvanlayıblar.
Diasporla İş üzrə Dövlət Komitəsindən AZƏRTAC-a bildirilib ki, məktubların göndərilməsində ABŞ-dakı Amerika Azərbaycan İnteqrasiya Mərkəzi, Amerika Azərbaycan Gənclər Federasiyası, İngiltərədəki Britaniya Azərbaycanlıları Cəmiyyəti, London İmperial Kollecinin Azərbaycan Tələbə Cəmiyyəti, Şotlandiyadakı Qlazqo Azərbaycan Tələbə Cəmiyyəti, Kanadadakı “Vətən” Azərbaycan İncəsənət və Mədəniyyət Cəmiyyəti, Alberta Azərbaycan Mədəniyyət Cəmiyyəti, İsraildəki Azərbaycan Mədəniyyət Mərkəzi fəallıq göstəriblər.
Etiraz məktubları Beynəlxalq Qırmızı Xaç Komitəsi, ABŞ Mina Məsləhət Qrupu, Birləşmiş Millətlər Təşkilatının Minalarla Mübarizə Xidməti, Beynəlxalq Amnistiya Təşkilatı, “Human Rights Watch”, Birləşmiş Millətlər Təşkilatının İnsan Hüquqları üzrə Ali Komissarlığının İdarəsi, BMT-nin İnkişaf Proqramı, İnsan Hüquqları Müdafiəçiləri Təşkilatı, Avropada Təhlükəsizlik və Əməkdaşlıq Təşkilatı kimi beynəlxalq qurumlara, eləcə də Kanada Birləşmiş Millətlər Assosiasiyasına və Böyük Britaniya İcmalar Palatasının üzvlərinə ünvanlanıb.
Məktublarda Ermənistan tərəfindən Azərbaycan ərazilərində basdırılmış mina və partlamamış hərbi sursatların mülki şəxslərin həyatına ciddi təhlükə yaratmaqda davam etdiyi qeyd olunaraq, Azərbaycanın işğaldan azad edilmiş ərazilərində minaların basdırılması nəticəsində faciələrin mütəmadi təkrarlanması, mina xəritələrinin verilməməsi hiddətlə pislənilib. Müraciətdə, həmçinin dünya ictimaiyyəti və beynəlxalq təşkilatlar bölgədə dayanıqlı sülhün və sabitliyin əldə olunması naminə Ermənistana güclü təzyiqlər göstərməyə, qətiyyətli addımlar atmağa çağırılıb.
