Cari ilin ilk aylarında tikinti sektorunun aktivliyi aşağı olsa da, sonrakı aylarda aktivlik artıb və ötən ilin müvafiq dövrünü üstələyib. Son illərdə tikinti sektorunun ÜDM-dəki payı müəyyən qədər dəyişkənlik nümayiş etdirsə də, ümumilikdə tikinti sektorunun həm nominal ÜDM həcmi, həm də ümumi iqtisadiyyatda payı artmaqdadır.
AZƏRTAC xəbər verir ki, bunu Mərkəzi Bankın Maliyyə sabitliyi departamentinin direktoru Ataxan Həsənov “Maliyyə Sabitliyi Hesabatı” ilə bağlı keçirilən brifinqdə çıxışı zamanı deyib.
Onun sözlərinə görə, ötən ilin müvafiq dövrü ilə müqayisədə tikinti sektoru üzrə nominal ÜDM 12,4 faiz, cəmi ÜDM-dəki payı isə 0,5 artaraq 6,3 faizə çatıb.
“Bu tendensiya investisiya axınlarının bərpa olunması, xüsusilə işğaldan azad olmuş torpaqların bərpası istiqamətində iri infrastruktur layihələrinin icrası, Bakı və Bakı ətrafı ərazilərdə iri tikinti layihələrinin həyata keçirilməsi və daşınmaz əmlak bazarında tələb amillərinin yüksək olaraq qalması ilə əlaqədar olub. Tikinti sektorunun stabil artım tempi iqtisadiyyatda ümumi investisiya mühitinin güclənməsinə və məşğulluq səviyyəsinin qorunmasına müsbət təsir göstərib. Beləliklə, son dövrlərdə tikinti sektorunun ÜDM-dəki payının artması ümumi iqtisadi aktivliyin dəstəklənməsində əhəmiyyətli rol oynayıb. 2025-ci ilin iyun ayının sonuna olan məlumatlara əsasən tikinti müəssisələrində çalışan muzdlu işçilərin sayı 2024-cü ilin sonu ilə müqayisədə 5,7 faiz artaraq 119 min nəfər təşkil edib”, - deyə Ataxan Həsənov qeyd edib.
Departamentin direktoru bu ilin I yarısında Azərbaycandakı sığorta şirkətlərinin dövlət istiqrazlarına investisiya qoyuluşunun 1 milyard manatdan 856 milyon manata qədər azaldığını da sözlərinə əlavə edib: “Səbəb Maliyyə Nazirliyinin istiqraz emissiyasının azalmasıdır. Buna baxmayaraq, sığorta şirkətlərinin investisiyalarında ən böyük payı dövlət qiymətli kağızları təşkil edib. Növbəti yerdə bank depozitləri qərarlaşıb. Yanvar-iyun aylarında bu istiqamətdə investisiyalar isə 395 milyon manatdan 600 milyon manata çatıb. Bundan başqa, sığorta şirkətləri daşınmaz əmlak sektoruna da az məbləğdə investisiya yatırıb”.
jpeg_1759829757.jpeg)
jpg_1765800994.jpg)
jpg_1765800788.jpg)
