Qısa vaxtda yaxşı qazanc

Ölkəmizdə kənd təsərrüfatının digər sahələri kimi, baramaçılığın inkişafına da göstərilən diqqət, o cümlədən  dövlətin bu sahəyə ayırdığı subsidiyalar öz bəhrəsini verir. 
Baramaçılığın inkişafına verilən bu dəstəkdən yararlanan rayonlardan biri də Tovuzdur. Cəmi bir ay ərzində çəkdikləri əziyyətin əvəzini görən rayon kümçüləri artıq 6 ildən çoxdur ki, bu gəlirli sahəyə böyük maraq göstərirlər. 
Tovuz Aqrar İnkişaf Mərkəzinin direktoru Emin Eyvazov da etiraf edir ki, son illər rayon sakinləri arasında baramaçılığa maraq xeyli artıb. Hər il bu sahədən götürdükləri qazancdan razı qalan kümçülər ildən-ilə fəaliyyətlərini genişləndirirlər. İstehsal olunmuş baramanın təhvilində elə bir problem yaşanmır. Kümçülər yaxşı bilirlər ki, baramanın alıcısı var və əlavə olaraq hər kiloqrama görə dövlət onlara subsidiya verir. Xatırladaq ki, keçən il rayonda 61 kümçü ümumilikdə 153 qutu tut ipəkqurdunu bəsləyərək 4633 kiloqramdan çox yaş barama təhvil vermişdir. Bir qutu yaş barama üçün təhvil verilmək norması 40 kiloqram olduğu halda, Tovuzda bu göstərici yüksək olmuşdur. Rayon kümçüləri cari ildə bu rəqəmi daha da artırmaq əzmindədirlər. Onlar keçən ildən fərqli olaraq bu il daha çox - 7 ton barama istehsal etməyi qarşılarına məqsəd qoymuşlar. Hədəfə çatmaq üçün istənilən qədər yem ehtiyatı var. 
Rayonda baramaçılıqda təcrübə qazanmış kümçülərdən biri də Sahib Qasımovdur. O, keçən il götürdüyü öhdəliyə 109,2 faiz əməl etmişdir. Təcrübəli kümçü Hüseyn Aslanov isə öhdəliyini 107 faiz yerinə yetirmişdir. Qovlar şəhər sakinləri də ötən il bol məhsul təhvil vermişlər. Allahverdi Zeynalov 6, Elman Allahverdiyev isə 4 qutu barama toxumu götürmüş və ailə üzvləri ilə birlikdə nəzərdə tutulduğundan çox barama istehsal etmişlər. 
Ümumiyyətlə, Tovuzda elə bir kənd yoxdur ki, orada barama saxlamağa maraq göstərməsinlər. Ən çox barama bəsləyən Aşağı Quşçu kəndinin sakinləri Ramin Verdiyev, Samirə Eyyubova, Qaratel Səmədova  və Sona Qələndərova bu il keçən ilki göstəricilərini təzələməyi qarşılarına məqsəd qoymuşlar. Cəlilli kəndinin sakinləri Ramin Qələndərov keçən il 6 qutu barama qurduna xidmət etmiş və 240 kiloqram barama təhvil vermişdir. Ramin də həmin göstəricini bu il yeniləmək istəyir. 
Hazırda Tovuz kümçüləri gərgin iş rejimi ilə işləyirlər. Onlar yaxşı bilirlər ki, daha çox məhsul, daha çox qazanc deməkdir. Odur ki, bütün imkanlardan istifadə etməyə çalışırlar.
                                                                                     
  Sabir ƏLİYEV,
 "Azərbaycan"