Rusiya ordusunun Kiyevə kütləvi hava hücumu 10 saata yaxındır davam edir.
AZƏRTAC xəbər verir ki, Kiyev şəhər meri Vitali Kliçkonun açıqlamasına görə, hava hücumu nəticəsində azı 2 nəfər həlak olub, 15 nəfər xəsarət alıb. Xəsarət alanların 8-i xəstəxanaya yerləşdirilib.
Hava hücumu zamanı Kiyev şəhərinin və onun vilayətindəki enerji infrastrukturlarına ciddi ziyan dəyib. Hazırda Kiyev şəhərinin bir hissəsi işıqsız qalıb.
08:04
Rusiya ordusunun Kiyevə 7 saatdan artıqdır davam edən çoxkombinasiyalı hava hücumu nəticəsində ölən və xəsarət alanlar var.
Kiyev şəhər Hərbi Administrasiyasının yaydığı məlumata görə, hava hücumu zamanı azı 1 nəfər həlak olub, 11 nəfər xəsarət alıb. Paytaxtın müxtəlif ərazilərində 3 çoxmərtəbəli binada dağıntılar qeydə alınıb.
Hazırda dağıntılar təmizlənir. Kiyevə və Ukraynanın bir çox bölgəsində hava həyəcanı davam edir.
05:12
Kiyevə hava hücumu zamanı hazırda biri uşaq olmaqla altı mülki şəxs xəsarət alıb. Xəsarət alan qadınlardan biri ağır vəziyyətdə xəstəxanaya yerləşdirilib.
Bu barədə Kiyev şəhər Hərbi Administrasiyasının rəhbəri Timur Tkaçenko "Teleqram" səhifəsində yazıb.
"Biz həmçinin, yerlərdən birində qadının ölməsi ehtimalı ilə bağlı xəbərləri araşdırırıq", - deyə Tlaçenko əlavə edib.
Onun sözlərinə görə, hava hücumu zamanı Kiyevin 6 ərazisində, o cümlədən Şevçenko, Solominski, Dneprovski rayonlarının yaşayış binalarına ziyan dəyib.
03:31
Rusiya ordusu noyabrın 29-na keçən gecədən başlayaraq Ukraynanın paytaxtı Kiyevə növbəti dəfə çoxkombinasiyalı hava hücumu həyata keçirir.
Gecə saatlarında hava hücumundan müdafiə sistemi işə düşüb, partlayış səsləri eşidilir. Hava hücumu zamanı müxtəlif tipli, o cümlədən ballistik raketlərdən, zərbə dronlarından istifadə edilib.
Zərərsizləşdirilən dronlar və raketlər Kiyevin bəzi yaşayış binalarında yanğına səbəb olub.
Kiyev şəhər meri Vitali Kliçko “Teleqram” səhifəsində yazıb ki, hava hücumu nəticəsində Darnitsk və Şevçenko rayonlarının çoxmərtəbəli binalarında dağıntılar qeydə alınıb. Həmin rayonlara həkim çağırışları qeydə alınıb. Hazırda zərərçəkənlərin sayı dəqiqləşdirilir.
Kiyev sakinləri təhlükəsizlik üçün metro stansiyalarından sığınacaq kimi istifadə edirlər.
jpg_1765706081.jpg)
