İsveçin aparıcı nəşrləri Azərbaycan Prezidenti İlham Əliyev və Ermənistanın baş naziri Nikol Paşinyanın ABŞ Prezidenti Donald Tramp ilə cümə günü Ağ evdə keçirilməsi planlaşdırılan görüşü barədə öz auditoriyasını məlumatlandırıb.
AZƏRTAC xəbər verir ki, “SVT Nyheter”in məqaləsində Donald Trampın bu görüşün “tarixi sülh sammiti” olacağı sözləri yer alıb. Nəşr onu da qeyd edir ki, ABŞ hər iki ölkə ilə regionun iqtisadi inkişafına yönəlmiş ikitərəfli sazişlər imzalamağı planlaşdırır. Bildirilir ki, bu, 1990-cı illərin əvvəlindən bağlanmış Cənubi Qafqazdan keçən əsas nəqliyyat marşrutlarının açılmasına gətirib çıxara bilər.
“Dagens Nyheter” yazır ki, Azərbaycan və Ermənistan uzun müddətdir Qarabağa görə hərbi münaqişə vəziyyətindədir. Qəzet xatırladır ki, 2023-cü ilin sentyabrında Azərbaycan Ordusu bu bölgəyə nəzarəti tam bərqərar edib. Qeyd edilir ki, qarşıdan gələn razılaşmalar regionda vəziyyətin sabitləşməsində mühüm rol oynaya bilər.
“Aftonbladet” qəzeti Donald Trampın “Truth Social”da dərc etdiyi paylaşıma istinad edir. ABŞ Prezidentinin “bir çox lider müharibəni bitirməyə çalışdı, lakin nəticəsiz qaldı – amma bu, TRUMP sayəsində bu günə qədər olub” sözlərini sitat gətirir. Nəşr onu da bildirir ki, Associated Press (AP) agentliyinin iki anonim mənbədən aldığı məlumata görə, sazişlər ABŞ-a Ermənistan ərazisindən Azərbaycanı Naxçıvanla birləşdirəcək nəqliyyat dəhlizinin yaradılması hüququnu verə bilər. Gələcəkdə dəhlizə neft-qaz kommunikasiyalarının, həm sərnişinlərin, həm də yüklərin daşınması üçün dəmir yolu xəttinin daxil olacağı güman edilir.
Həmin mənbələrə görə, görüşün nəticəsi Türkiyə ilə Ermənistan arasında 40 ilə yaxındır bağlı qalan sərhədlərin bərpasına zəmin yarada bilər.
İsveç mediası qarşıdakı görüşü böyük diplomatik və geosiyasi əhəmiyyətə malik olan hadisə kimi qiymətləndirir.
