Dekabrın 9-da Türkiyənin İstanbul şəhərində Azərbaycan Turizm Bürosunun rəsmi nümayəndəlik ofisinin açılış mərasimi keçirilib.
AZƏRTAC xəbər verir ki, mərasimdə Dövlət Turizm Agentliyinin sədri Fuad Nağıyev, Azərbaycanın İstanbuldakı baş konsulu Nərminə Mustafayeva, Azərbaycan Turizm Bürosunun İdarə Heyətinin sədri Florian Zenqstşmid, eləcə də Türkiyənin və Azərbaycanın turizm sənayesinin təmsilçiləri və media nümayəndələri iştirak ediblər.
Tədbirdə çıxış edən Fuad Nağıyev nümayəndəliyin fəaliyyətə başlamasının ölkələrimiz arasında əməkdaşlığın inkişafında yeni mərhələ olduğunu, ikitərəfli münasibətlərin sistemli və səmərəli şəkildə davam etdirilməsi üçün mühüm platforma rolunu oynayacağını, Azərbaycanın turizm brendinin Türkiyədə daha geniş tanıdılmasına töhfə verəcəyini bildirib. O, türkiyəli ziyarətçilərin Azərbaycana marağının getdikcə artdığını və son 5 ildə ölkəmizə gələn xarici turistlər arasında onların ikinci yeri tutduğunu qeyd edib.
Tədbirdə çıxış edən Türkiyənin mədəniyyət və turizm nazirinin müavini Serdar Çam bu büronun iki qardaş ölkə xalqlarının bir-birini daha yaxından tanımasına xidmət edəcəyini deyib.
Baş konsul Nərminə Mustafayevə çıxışında büronun xalqlarımız arasındakı bağların daha da dərinləşməsinə vəsilə olacağına inamını ifadə edib.
Tədbir çərçivəsində hər iki ölkənin turizm sənayesinin nümayəndələri arasında müvafiq sahədə əməkdaşlığın gücləndirilməsinə dair fikir mübadiləsi aparılıb.
Qeyd edək ki, 2025-ci ilin 11 ayı ərzində Azərbaycana səfər edən Türkiyə vətəndaşlarının sayı 416 mindən çox olub ki, bu da 2024-cü illə müqayisədə 7 faiz artım deməkdir.
