Ölkələrimiz arasında münasibətlər həqiqətən müttəfiqlik xarakteri daşıyır və ən yüksək səviyyədə aparılan sabit siyasi dialoqa əsaslanır.
AZƏRTAC xəbər verir ki, bu fikirləri Astanada keçirilən Qazaxıstan–Azərbaycan biznes forumunda Azərbaycanın iqtisadiyyat nazirinin müavini Anar Axundov səsləndirib.
Onun sözlərinə görə, son illər ərzində Azərbaycan və Qazaxıstan bir çox sahələrdə – siyasi, ticarət-iqtisadi, mədəni və humanitar əməkdaşlıq istiqamətlərində əhəmiyyətli nəticələr əldə ediblər.
“İkitərəfli münasibətlərin heyrətamiz inkişaf dinamikası, ilk növbədə qarşılıqlı səfərlər və yüksək səviyyəli görüşlər əlaqələrimizin möhkəmlənməsində və bütün istiqamətlər üzrə qarşılıqlı faydalı tərəfdaşlığın dərinləşdirilməsi üçün yeni imkanların yaradılmasında mühüm rol oynayır. Azərbaycan ilə Qazaxıstan arasında iqtisadi əlaqələr dinamik şəkildə inkişaf edir və yeni sahələri əhatə edir. Ölkələrimiz arasında ikiqat vergitutmanın aradan qaldırılmasından və qarşılıqlı investisiyaların qorunmasından tutmuş ticarət və nəqliyyatın inkişafınadək əsas əməkdaşlıq istiqamətlərini tənzimləyən təxminən 170 ikitərəfli sənəd imzalanıb”, – deyə nazir müavini bildirib.
A.Axundov vurğulayıb ki, son illərdə qarşılıqlı ticarət sabit artım nümayiş etdirir. “Təkcə bu ilin yanvar–sentyabr aylarında ölkələrimiz arasında ticarət dövriyyəsinin həcmi 568 milyon ABŞ dolları təşkil edib ki, bu da ötən ilin eyni dövrü ilə müqayisədə təxminən üç dəfə çoxdur. Bu gün Azərbaycanda Qazaxıstan kapitalının iştirakı ilə təxminən 250 kommersiya qurumu fəaliyyət göstərir. Bizim sahibkarlarımız da Qazaxıstanda biznesin inkişafında fəal iştirak edirlər”, – deyə o qeyd edib.
Nazir müavini Qazaxıstan biznesinin Azərbaycanın işğaldan azad edilmiş ərazilərinin bərpasında fəal iştirakını xüsusi vurğulayıb.
“Təhsil, səhiyyə, infrastruktur və tikinti kimi əsas sahələr üzrə 50-dən çox layihə təklifi təqdim olunub”, – deyə o bildirib.
A.Axundovun fikrincə, ikitərəfli iqtisadi gündəliyin praktiki irəliləməsində İqtisadi əməkdaşlıq üzrə Hökumətlərarası Komissiya mühüm rol oynayır.
“Komissiyanın iyirmi birinci iclası ötən həftə Bakıda keçirilib. İkitərəfli təmasların müxtəlif sahələrdə inkişafına dair konkret addımlar razılaşdırılıb ki, bu da Azərbaycan–Qazaxıstan tərəfdaşlığının geniş spektrinə yeni impuls verəcək. Azərbaycan və Qazaxıstan region üçün strateji əhəmiyyət daşıyan birgə innovativ və infrastruktur layihələri uğurla həyata keçirirlər. Onlardan biri Xəzər dənizinin dibi ilə çəkilən Trans-Xəzər optik-lifli rabitə xəttidir. Ölkələrimizin aparıcı telekommunikasiya operatorları arasında imzalanmış sazişlərə əsasən bu layihənin icrasına başlanılıb. Layihə Avropa ilə Asiya arasında Azərbaycan üzərindən rəqəmsal telekommunikasiya dəhlizinin yaradılmasını hədəfləyən “Rəqəmsal İpək Yolu”nun mühüm tərkib hissəsidir. Təşəbbüs çərçivəsində Xəzərin dibi ilə yüksək sürətli internet, trafik və çoxterabitlik məlumat ötürülməsini təmin edəcək optik kabelin çəkilməsi nəzərdə tutulur. Layihənin tamamlanması regional tərəfdaşlığı gücləndirəcək və iştirakçı ölkələrin dayanıqlı rəqəmsal inkişafında yeni səhifə açacaq”, – deyə o vurğulayıb.
Nazir müavini əlavə edib ki, digər mühüm istiqamətlərdən biri “Orta Dəhliz” kimi tanınan Trans-Xəzər beynəlxalq nəqliyyat marşrutunun inkişaf etdirilməsidir.
“Azərbaycan ərazisindən keçən marşrut artıq uğurla fəaliyyət göstərir. Ölkəmiz bu qlobal logistika zəncirinin mühüm strateji qovşağıdır. Qazaxıstan 2030-cu ilə qədər Orta Dəhliz üzrə yükdaşımaların həcmini 500 min konteynerə çatdırmağı qarşısına məqsəd qoyub. Azərbaycan bu istiqamətə xüsusi əhəmiyyət verir, çünki bu, regionun tranzit cəlbediciliyini artırır və hər iki ölkənin şirkətləri üçün yeni imkanlar yaradır. Həmçinin, TRIPP təşəbbüsünün həyata keçirilməsi nəticəsində Zəngəzur dəhlizinin Avrasiya üçün əsas nəqliyyat qovşağına çevriləcəyini qeyd etmək istərdim. Bu da, şübhəsiz, regionumuzda tərəfdaşlığın və inkişafın möhkəmlənməsinə xidmət edəcək”, – deyə Anar Axundov çıxışını yekunlaşdırıb.
jpg_1765800994.jpg)
jpg_1765800788.jpg)
