52 ölkədən 140 xarici qonağın, o cümlədən 30-a yaxın informasiya agentliyinin, 7 beynəlxalq təşkilatın, 80 media strukturunun, eləcə də digər ixtisaslaşmış qurumların nümayəndələrinin iştirak etdiyi III Şuşa Qlobal Media Forumunda Prezident İlham Əliyev Azərbaycan mediasının fəaliyyətini yüksək dəyərləndirdi.
İyulun 19-da Xankəndidə "Rəqəmsal keçidlər: Süni intellekt dövründə informasiya və media dayanıqlılığının gücləndirilməsi" mövzusunda öz işinə başlayan III Şuşa Qlobal Media Forumunda Prezident İlham Əliyev bu dəfə də əsasən forum iştirakçılarının suallarını cavablandırdı.
Öncə onu vurğulayaq ki, bu, sayca 3-cü forum idi. I Qlobal Media Forumu 2023-cü ildə Şuşada keçirilib. Şuşanın erməni işğalından azad olunmasından sonra bu ilk böyük beynəlxalq forum kimi tarixə yazılıb. Məqsəd isə Azərbaycan həqiqətlərini beynəlxalq jurnalistlərə birbaşa yerində çatdırmaq idi. 50-dən çox ölkədən gələn jurnalistlərin qatıldığı forumda Prezident İlham Əliyevin çıxışı Qarabağ Zəfərinin ideoloji təqdimatı olmuşdur.
İkinci forum isə 2024-cü ildə daha geniş miqyasda idi. Bu dəfə tədbir daha çox texnoloji və strateji baxımdan zənginləşdirilmişdir. İştirakçı sayı artmış, mövzu spektri genişlənmişdir. Əsas mövzular sırasında dezinformasiyaya qarşı beynəlxalq əməkdaşlıq, sosial media nizamlaması, media savadlılığı və süni intellektin rolu olmuşdur.
III Şuşa Qlobal Media Forumu isə öncə Xankəndidə start götürdü, Şuşada davam etdi. Budəfəki forum rəqəmsal keçidlər, süni intellekt dövründə informasiya və media dayanıqlılığının gücləndirilməsi mövzusuna həsr olunmuşdu. Aparılan müzakirələr məhz medianın çağırışlar və imkanlar qarşısında müqavimətinin gücləndirilməsinə, o cümlədən rəqəmsal transformasiyanın təsirinə və müstəqil jurnalistikanın, sülhün, inkişafın, qarşılıqlı anlaşmanın daha da artırılmasına yönəlmişdir.
Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin söylədiyi kimi, dünyanın müxtəlif ölkələrindən media nümayəndələrinin və fikir adamlarınin dəvət edildiyi forumda müxtəlif ideyalar və yenilikçi baxışlar formalaşmış və paylaşılmışdır. Şuşa Qlobal Media Forumu Prezidentlə birbaşa ünsiyyət platforması kimi də olduqca önəmli olmuşdur.
Xarici ekspertlərin də söylədikləri kimi, bu forumda müzakirə edilən məsələlər onu deməyə əsas verir ki, artıq Şuşa Qlobal Media Forumu təşəbbüsdən daha çox instituta çevrilib. Digər tərəfdən Şuşaya, Xankəndiyə təşrif buyuran qonaqlar rastlaşdıqları mənzərələri gördükdə Azərbaycanın həm də iqtisadi qüdrətinə şahidlik etdilər. İlk dəfə 2023-cü ildə Füzuliyə, Şuşaya gələn xarici ölkələrin, beynəlxalq təşkilatların nümayəndələri ermənilərin xarabalığa çevirdikləri ərazilərdə Azərbaycanın qısa vaxtda yaratdığı möcüzələri görüb heyran qaldılar.
Forumda Prezident İlham Əliyevin regionla və qlobal sülhün konsepti ilə bağlı söylədiyi fikirlər, geniş və məzmunlu çıxışı olduqca yaddaqalan oldu. Dövlət başçısı demək olar regionda baş verən bütün hadisələri dəyərləndirdi, yeni reallıqlarla bağlı fikirlərini bölüşdü və Azərbaycan həqiqətləri ilə yanaşı, ölkə mediasının bugünkü vəziyyətini qiymətləndirdi.
Prezidentin Azərbaycan mediası haqqında qeydləri demək olar ki, KİV-ə göstərilən böyük etimadın göstəricisi və zəhmətinə verilən ən yüksək və ali qiymətdir. Dövlət başçısının media haqqında söylədiyi fikirlər həm də məsuliyyətdir və biz bu məsuliyyəti dərindən dərk edirik.
Rəşad BAXŞƏLİYEV,
"Azərbaycan"
