Prezident İlham Əliyevin idmançılara xüsusi qayğısı möhtəşəm uğurları şərtləndirib
Azərbaycanın müasir inkişafı ilə bağlı ən mühüm göstəricilərdən biri də idman sahəsində əldə edilən böyük uğurlardır. Bu uğurların arxasında isə Prezident İlham Əliyevin idmançılara göstərdiyi xüsusi diqqət və qayğı dayanır. İdmançılara olan dəstək onların beynəlxalq arenada təmsil olunmalarını daha uğurlu və effektiv etməyə, həm də Azərbaycanın idman sahəsindəki mövqeyini gücləndirməyə imkan yaradıb.
Prezident İlham Əliyev idman sahəsini yalnız fiziki fəaliyyət kimi deyil, eyni zamanda sosial, mədəni və milli bir vasitə kimi görür. Dövlət başçısı idmanı ölkənin inkişafı üçün mühüm bir istiqamət olaraq müəyyən edib və bu sahədə çoxsaylı islahatlar, investisiyalar və proqramlar həyata keçirib.
Milli Olimpiya Komitəsinin Prezidenti İlham Əliyev idmançılara yalnız maddi dəstək verməklə kifayətlənmir. Prezident Azərbaycan idmançılarının beynəlxalq səviyyədə uğurlu nəticələr əldə etmələri üçün yüksəksəviyyəli tədbirlər görür, onlar üçün hər cür şərait yaradır. Bu, idmançılara dünya və Avropa çempionatlarında, Olimpiya oyunlarında iştirak etməklə ölkənin bayrağını yüksəltmək imkanı verir.
Dövlətin idmançılara verdiyi stimullar və mükafatlandırma sistemi də onların motivasiyasını artırır. Prezident İlham Əliyev yalnız idmançılara deyil, həm də məşqçilərə, idman təşkilatçılarının işinə yüksək qiymət verərək, bu sahədə motivasiyanı təmin edir. Olimpiya və dünya çempionatlarında medal qazanan idmançılara verilən dövlət mükafatları onların növbəti mərhələdə daha yüksək nəticələr əldə etmələrinə stimul verir.
Azərbaycan idmançılarının beynəlxalq səviyyədə uğur əldə etmələri üçün ən vacib şərtlərdən biri də müasir və inkişaf etmiş idman infrastrukturunun mövcudluğudur. Prezident İlham Əliyev ölkənin idman infrastrukturunun təkmilləşdirilməsi istiqamətində mühüm layihələr gerçəkləşdirib. Bunun nəticəsində Azərbaycanda 46 müasir olimpiya idman kompleksi, məşq mərkəzləri, idman zalı və stadionlar inşa edilib.
Ümumiyyətlə, idman xalqın sağlamlığını qorumaq, gəncləri düzgün yetişdirmək, sosial inteqrasiyanı gücləndirmək və ölkənin beynəlxalq nüfuzunu artırmaq üçün ən vacib vasitələrdən biridir. Azərbaycan dövləti də idmanın inkişafına xüsusi diqqət yetirir və bu sahəyə sərmayə qoyur.
Bu gün idmanın inkişafı həm də ölkənin sosial həyatının ayrılmaz bir hissəsinə çevrilib. İdman yalnız fiziki fəaliyyət deyil, həm də əxlaqi və psixoloji cəhətdən insanları birləşdirən, motivasiya edən bir elementdir. Azərbaycanda idmanın sosial və mədəni əhəmiyyəti xüsusilə gənclər arasında sağlam həyat tərzinin təşviqi ilə özünü göstərir.
Gənclərin idmana cəlb edilməsi dövlətin uzunmüddətli siyasətinin mühüm hissəsidir. İdman gənclər arasında sağlam həyat tərzinin təşviq edilməsinin və sosial şəbəkənin inkişaf etdirilməsinin effektiv vasitəsidir. Gənclərin idmanla məşğul olmaları onların fiziki inkişafını, psixoloji sağlamlığını və mənəvi dəyərləri qorumağa kömək edir.
İdmanın inkişafı yalnız sosial sahədə deyil, iqtisadiyyatda da mühüm təsirlərə malikdir. İdman tədbirlərinin təşkil edilməsi, idman turizminin inkişafı, idman mallarının istehsalı və idman xidmətləri sektoru Azərbaycan iqtisadiyyatına əlavə dəyər yaradır. Ölkədə keçirilən beynəlxalq idman tədbirləri xarici turistləri cəlb edir və bununla da turizm sektorunun inkişafına təkan verir. Həmçinin idman infrastrukturlarına olan tələbat tikinti və inşaat sektorunun artmasına səbəb olur.
Azərbaycanda idmanın gələcəyi çox ümidvericidir. Dövlətin idmana göstərdiyi diqqət və dəstək bu sahənin inkişafını daha da sürətləndirəcək. Gələcəkdə daha çox beynəlxalq tədbirlərin keçirilməsi, idman sahəsindəki təhsilin keyfiyyətinin artırılması və idman mədəniyyətinin genişləndirilməsi istiqamətində islahatlar həyata keçiriləcək.
Dekabrın 26-da 2025-ci ilin idman yekunlarına həsr olunan mərasimdə çıxış edən Azərbaycan Prezidenti İlham Əliyev bir daha ötən dövrün uğurlu nəticələrinə diqqət yetirdi. Ənənəvi olaraq hər ilin sonunda idmançılarla görüş keçirilir, ilin yekunları müzakirə edilir, idmançılar, idman mütəxəssisləri mükafatlandırılırlar. Bu il idmançılarımız tərəfindən qazanılan medalların sayı rekord həddə çatıb. Beynəlxalq yarışlarda idmançılarımız tərəfindən 2000-dən çox medal, təqribən 600-dən çox qızıl medal qazanılıb. Bu bir daha onu göstərir ki, idmanın inkişafı Azərbaycanda uğurla gedir. Keçən illə müqayisədə medalların sayı daha çoxdur. İdmanın inkişafına göstərilən diqqət, aparılan dövlət siyasəti, əlbəttə ki, ildən-ilə daha yaxşı nəticələrə gətirib çıxarır.
Prezident vurğuladı ki, Azərbaycanda idmanın inkişafı dövlət siyasətidir və dövlət xətti ilə bir çox proqram icra edilir. İdman infrastrukturu demək olar ki, sıfırdan qurulub və bu gün ən yüksək səviyyədədir. Bölgələrdə idmanla məşğul olmaq üçün bütün şərait var. Bu il iki Olimpiya İdman Kompleksinin tikintisi yekunlaşıb - Gəncədə və Yevlaxda. Beləliklə, bölgələrdə Olimpiya İdman komplekslərinin sayı 46-ya çatıb.
Əlbəttə ki, bütün bunlar, eyni zamanda düzgün aparılan siyasət idmanın inkişafını şərtləndirir və gəncləri idmanla məşğul olmağa daha da həvəsləndirir. Bu da çox önəmlidir. Çünki sağlam gənc nəsil yetişməsə, idman uğurlarını əldə etmək mümkün olmayacaq. Sağlam gənc nəsil ilk növbədə ölkənin gələcək inkişafı üçün lazımdır ki, Azərbaycan əhalisi, Azərbaycan vətəndaşları fiziki cəhətdən sağlam olsunlar. Eyni zamanda uşaqlıqdan idmana göstərilən maraq gələcəkdə idman uğurlarına yol açır.
Dövlət siyasətinin əsas istiqamətlərindən biri də gəncləri sağlam ruhda, vətənpərvərlik ruhunda tərbiyə etməkdir ki, gənclər Vətən sevgisi ilə böyüsünlər, yaxşı tərbiyə alsınlar və beləliklə, ölkəmizin inkişafı davamlı olsun, əbədi olsun. Əlbəttə ki, burada əsas amil cəmiyyətdə mövcud olan ab-havadır. Bizim xalqımız böyük dərəcədə həmrəylik, vətənpərvərlik göstərir və son illərin hadisələri bunu bir daha təsdiqləyir. Gənclərin fiziki hazırlığı, mənəvi saflığı vəhdət təşkil etməlidir. Məhz o halda ölkə uğurla inkişaf edə bilər.
Rəşad BAXŞƏLİYEV,
"Azərbaycan"
