"SOCGOV 2025" beynəlxalq konfransı sosial xidmətlərin gələcək inkişafı, yeni idarəetmə yanaşmaları və beynəlxalq təcrübənin paylaşılması baxımından mühüm platforma olacaq.
AZƏRTAC xəbər verir ki, bunu “Süni intellekt insan və transformasiya üçün” mövzusunda keçiriləcək konfransla bağlı DOST Agentliyində keçirilən mətbuat konfransında agentliyin İdarə Heyətinin sədri Fərid Məmmədov bildirib.
Qeyd olunub ki, konfransın keçirilməsində məqsəd yerli və beynəlxalq ekspertləri bir araya gətirməklə sosial xidmətlər sahəsində sürətli inkişaf perspektivlərinin qiymətləndirilməsi, innovativ yanaşmaların, süni intellekt alətlərinin və müasir texnologiyaların tətbiq edilməsi ilə gələcək inkişaf yollarının müəyyənləşdirilməsidir.
Fərid Məmmədov deyib ki, konfransda dünyanın 20-yə yaxın ölkəsindən nümayəndələr iştirak edəcəklər. Tədbir vətəndaşların sosial müdafiəsində dayanıqlılıq və innovativlik mövzularını gündəmə gətirəcək. Ekspertlər rəqəmsal dövlət və süni intellektlə transformasiya, sosial xidmətlərdə süni intellekt və sosial inklüzivlik, həmçinin əmək bazarının gələcəyi, bacarıqların inkişafı və rəqəmsal sahibkarlıq mövzularında müzakirələr aparacaqlar.
"Beynəlxalq konfransda 10 ölkə rəsmi səviyyədə təmsil olunacaq. DOST Agentliyinin brendinə çevriləcək SOCGOV tədbirləri 5 il müddətini əhatə edəcək. Növbəti illər ərzində tədbirlərin səviyyəsi və əhatəliliyini genişləndirmək istəyirik. "SOCGOV 2026" sosial sahədə beynəlxalq mükafatlandırma formatında təşkil ediləcək. Bu, regionda ilk dəfə sosial sahədə mükafatlandırma tədbiri olacaq. Həm Azərbaycan, həm də digər ölkələrdən təqdim olunan layihələrin qiymətləndirilməsi aparılacaq. Sosial müdafiə məşğulluq sahəsində həyata keçirilən layihələrin qiymətləndirilməsindən sonra mükafatlandırılma mərasimi olacaq. 2027-ci ildə bu tədbir Türkdilli ölkələr üzrə Zirvə toplantısı səviyyəsində olacaq. 2028 və 2029-cu illərdə daha yüksəksəviyyəli forumların keçirilməsi, son olaraq ən yüksək səviyyədə sosial sahədə forumun keçirilməsi planlaşdırılır. Bu brend DOST Agentliyi tərəfindən aktiv təşviq ediləcək", - deyə F. Məmmədov vurğulayıb.
