Yeni Azərbaycan Partiyası Lənkəran Rayon Təşkilatının qərargahında Azərbaycan Yazıçılar Birliyinin Lənkəran regional bölməsinin üzvləri ilə birlikdə "Şəhərsalma və Memarlıq İli" çərçivəsində təşkil olunan tədbir "Heydər Əliyev irsi ədəbi düşüncələrdə" adlanırdı.
Ulu Öndər Heydər Əliyevin və Vətən müharibəsi şəhidlərinin əziz xatirəsini birdəqiqəlik sükutla anılmasıyla başlanan tədbirdə YAP Lənkəran Rayon Təşkilatının sədri İqbal Əmənullayev dedi: "14 iyul 1969-cu il qüdrətli Azərbaycan dövlətinin təməlinin qoyulduğu gün kimi tarixə düşmüşdür. Heydər Əliyevin hakimiyyətə gəldiyi illərdə respublikada klassik mədəni irsimizin öyrənilməsi, milli özünüdərk, milli mənlik şüurunun dirçəldilməsi dahi şəxsiyyətin simasında dolğun mövcudluğunu yaşamışdır. Ulu Öndər həmişə Azərbaycan yazarlarının qayğısına qalmış, onların fəaliyyətini yüksək qiymətləndirmiş, yazıçı və şairlərə Dövlət mükafatları, fəxri adlar verilməsini, onların yubileylərinin keçirilməsini diqqət mərkəzində saxlamışdır. Onun siyasi fəaliyyətində ədəbiyyat amilinin yeri, rolu və imkanları çox geniş anlayış olmuşdur".
Natiq Ulu Öndərin təşəbbüsü ilə 27 aprel 1978-ci ildə Azərbaycan dilinin dövlət dili kimi Konstitusiyada təsbit olunduğunu da görüş iştirakçılarının diqqətinə çatdırdı.
"Heydər Əliyev həmişə Azərbaycan ədəbiyyatının nümayəndələrinə hami olmuş, klassik ədəbiyyatın inkişafı, xalqa qaytarılması istiqamətində bir sıra möhtəşəm işlər görmüşdür", - deyən Azərbaycan Yazıçılar Birliyinin Lənkəran regional bölməsinin sədri, yazıçı-publisist Qafar Cəfərli bildirdi ki, Heydər Əliyev ədəbiyyat və mədəniyyət xadimləri ilə şəxsən tanış olur, onların yaradıcılığını yaxından öyrənir və bu insanlara həmişə xüsusi diqqət və qayğı göstərirdi.
Yazıçılar Birliyinin üzvləri - professor Yədulla Ağazadə, şair Səyavuş Süleymanlı, yazıçı-publisist Hafiz Mirzə, şair Əhməd Haqsevər, şair Ziyafət Yəhya, şair Xatirə Xatun, şair Bəxtiyar Əliyar, yazıçı-publisist Bəxtiyar Hüseynov, dosent Leyla Məcidova, yazıçı-publisist Xudaverdi Cavad, şair Ofelya Nəzərova çıxış edib Heydər Əliyevin "Dədə Qorqud" dastanının 1300 illiyinin keçirilməsi ilə bağlı imzaladığı sərəncamın ən unudulmazlar sırasında olduğundan, Nizami Gəncəvi ilə bağlı gördüyü böyük işlərdən, Füzuli və Nəsiminin yubileylərinin beynəlxalq miqyasda qeyd edilməsindən, Molla Pənah Vaqifin məqbərəsinin inşa edilməsindən bəhs etdilər. Onlar Heydər Əliyevin Hüseyn Cavidə nə qədər həssas yanaşdığından və onun nəşinin uzaq Sibirdən vətənə gətirmək kimi üzərinə böyük bir missiyanı götürməsindən söhbət açdılar. Eləcə də Azərbaycan bədii ədəbi irsinin mahir bilicisi olmuş Heydər Əliyevin milli ədəbiyyata, onun ölməz yaradıcılarına olan xüsusi maraq və sevgisindən danışdılar.
Zəfər ORUCOÜLU
