Regional inkişaf dövlət proqramlarında, habelə ayrı-ayrı rayon və şəhərlərin problemlərinin həllinə dair əlavə tədbirlərlə bağlı Prezidentin imzaladığı  sərəncamlarda nəzərdə tutulan vəzifələrin icrası ölkədə, ilk növbədə, qeyri-neft sektorunun davamlı inkişafını təmin etmiş,  xüsusən sahibkarlıq mühitinin yaxşılaşmasına və nəticədə  investisiya qoyuluşunun artmasına, yeni müəssisələrin və iş yerlərinin açılmasına, bununla əhalinin məşğulluğunun təminatına və yoxsulluq səviyyəsinin azalmasına təkan vermişdir. 
Bu baxımdan, Göygöl rayonu da istisna deyil. Keçən il rayonda ümumi məhsul istehsalı əvvəlki illərlə müqayisədə 5,6, sənaye məhsullarının həcmi 2,7, kənd təsərrüfatında ümumi məhsul istehsalı 2 dəfə artmışdır. 2022-ci il ərzində Sahibkarlığın İnkişafı Fondu vasitəsilə sahibkarlara 80 layihə üzrə 1,7 milyon manat güzəştli kredit verilmiş və həmin hesaba 27 yeni iş yeri açılmışdırsa, ötən il fond vasitəsilə sahibkarlar 107 layihə üzrə 2,9 milyon manat güzəştli kredit almışlar, yeni açılan iş yerlərinin sayı isə 38 olmuşdur. 2023-cü il ərzində iqtisadiyyatın əsas sahələri üzrə məhsul buraxılışının dəyəri 266,9 milyon manata çatmış, bu göstəricinin hər nəfərinə düşən məbləğ isə 4124,1 manat təşkil etmişdir. Məhsul və xidmətlərin 71,1 faizi istehsal sahələrinin, 28,9 faizi isə xidmət sahələrinin payına düşmüşdür. Aqrar sektora gəldikdə, keçən il kənd təsərrüfatında istehsal edilən ümumi məhsulun faktiki qiymətlərlə dəyəri 69,4 milyon manat olmuşdur ki, onun da 47,7 milyon manatlığı heyvandarlıq, 21,7 milyon manatlığı bitkiçilik məhsullarının payına düşmüşdür. Əvvəlki ilin müvafiq dövrü ilə müqayisədə heyvandarlıq sahəsində məhsul istehsalı 6,3 faiz artmışdır. Ötən ilə dair daha müsbət fakt istehsal olunan sənaye məhsullarının həcmində qeyri-dövlət sektorunun xüsusi çəkisinin 74,3 faiz olmasıdır.
Məlum olduğu kimi, Göygöl həm də perspektivli turizm rayonudur. Odur ki, rayonda bu sahənin inkişafı həmişə  diqqət mərkəzində saxlanılır. Yeri gəlmişkən qeyd edək ki, keçən il Göygölə 113 mindən çox, Göygöl Milli Parkına isə 203 min turist səfər etmişdir ki, bu da  2022-ci ilin müvafiq dövrü ilə müqayisədə təxminən 30 min nəfər çoxdur. 
Göygöl  Rayon İcra Hakimiyyəti başçısı aparatı yanında məşğulluğa kömək göstərən əlaqələndirmə komitəsi Prezidentin 9 oktyabr 2017-ci il tarixli sərəncamı ilə təsdiq edilmiş "Azərbaycan Respublikasında qeyri-rəsmi məşğulluğun qarşısının alınmasına dair Tədbirlər Planı"nın icrasının təmin olunması üçün aidiyyəti qurumların nümayəndələrinin iştirakı ilə 2023-cü ildə 4, 2024-cü ilin 1-ci rübündə 2 dəfə olmaqla rayonda fəaliyyət göstərən iri müəssisələrdə görüşlər keçirmişdir. Bundan başqa, sahibkar və fermerlərin iştirakı ilə iclaslar keçirilmiş, qeyri-rəsmi məşğulluğun qarşısının alınması, rəsmiləşdirilməyən əmək münasibətləri, əlaqələndirmə komitəsinin işinin səmərəli təşkili, aidiyyəti dövlət qurumları ilə əlaqələndirmənin təmin edilməsi istiqamətində tədbirlər görülmüşdür.
Göygöl şəhərinin infrastrukturunun yaxşılaşdırılması istiqamətində də tədbirlər həyata keçirilir. Şəhərin bir çox küçələrinə səki daşları və bordürlər düzülmüş, yeni asfalt örtüyü salınmışdır. Eyni zamanda yaşayış və inzibati binaların fasadları təmir olunmuşdur.

Sabir ƏLİYEV,
"Azərbaycan"