Fransalı siyasətçi Marin Le Pen və Milli Birlik partiyasının digər üzvləri Avropa Parlamentinin əməkdaşlarını fırıldaq yolu ilə işə götürməkdə ittiham olunurlar, dəymiş ziyan milyonlarla avro dəyərində qiymətləndirilir. Le Pen təqsirli bilinərsə, o, prezidentliyə namizəd ola bilməyəcək.

Sentyabrın 30-da Parisdə cinayət məhkəməsində ifrat sağçı partiyanın rəhbərliyinin işi üzrə proses başlayıb. Siyasətçilər Avropa İttifaqının vəsaitlərini mənimsəməkdə və Avropa Parlamentinin deputatlarının qondarma köməkçilərini işə götürməklə partiyanı gizli şəkildə maliyyələşdirməkdə ittiham olunurlar. Bu ittihama görə maksimum cəza on ilə qədər həbsdir. Ümumi zərərin təxminən 7 milyon avro olduğu bildirilir. Bildirilir ki, Marin Le Pen artıq bu məbləğin 330 min avrosunu Avropa Parlamentinə qaytarıb.

Marin Le Pen təqsirli bilinərsə, o, 2027-ci ildə keçiriləcək prezident seçkilərində iştirak edə bilməyəcək.

İttihama görə, Milli Birlikdən Avropa Parlamentinin deputatlarına köməkçi kimi işə götürülən şəxslər əslində Aİ-dəki nümayəndələri üçün deyil,  Le Pen və ya onun partiyası üçün çalışıblar. Məsələn, deputat  “köməkçilərindən” biri Tyerri Leqye təxminən iyirmi il ərzində partiyanın qurucusu Jan-Mari Le Penin , sonra isə Marin Le Penin cangüdəni olub.

Le Penin katibi, bir müddət onun gəlini olan Katrin Qrize də Avropa Parlamentinin deputatının köməkçisi kimi qeyd edilib. Bununla belə, Qrieznin giriş kartındakı məlumatlara əsasən, o, il ərzində Avropa Parlamentində cəmi bir yarım iş günü keçirib.

Marin Le Pen ilə yanaşı, onun bacısı Yan və keçmiş ortağı Lui Alio da müttəhimlər kürsüsündə yer alıblar. Marin Le Penin atası, 96 yaşlı Jan-Mari Le Pen də ittiham olunanların siyahısındadır, lakin səhhəti ilə bağlı dinləmələrə qatılmamasına icazə verilib. 

İş üzrə ümumilikdə 27 nəfər ittiham olunur, dinləmələr noyabrın ortalarına qədər davam edəcək.

Rizvan CƏFƏROV,

"Azərbaycan"