Bağışlamaq böyüklükdəndir. Azərbaycan böyüklük edir... Yıxdığını kəsməmək, aman diləyənə imkan vermək türkün adətidir. 44 günlük müharibədə yenilən, aciz duruma düşüb aman diləyən düşmənə mərhəmət göstərdik. Etdiyi vəhşiliklərə, tökdüyü qanlara rəğmən, qalıb torpaqlarımızda yaşamalarına imkan verdik... Humanistlik göstərib sülh təklif etdik. Hərbi, iqtisadi, siyasi bataqlıq girdabında çabalayan Ermənistan rəhbərlərinə yol göstərdik...
Yolunu azmış məkrli düşmən yenə hiyləyə, fitnəyə əl atıb. Sülh danışıqları altında vaxt uzadıb revanş götürmək niyyətinə düşüb. Humanitar məqsədlər üçün verdiyimiz yol ilə ərazilərimizə silah daşımaq istəyir. Buna nail olmayanda Azərbaycanı provakasiyaya çəkib əleyhimizə təbliğat aparmaq istəyirlər. Özlərini "yazıq", "köməksiz" göstərmək üçün fürsət axtarırlar. Ağır döyüş texnikalarını sərhədlərimizə cəmləyib silahlı təxribat törətməyə çalışırlar. Zəngəzur nəqliyyat dəhlizini açmayıb özlərinə "status" tələb edirlər... Fransanın, digər dövlətlərin əlində oyuncaq olanlar bizimlə oyun oynamaq niyyətinə düşürlər...
Cavabımız çox qısa və dəqiqdir. Oyun bitib! Amma yenə də haylar və havadarları dədə-babalarından qalan köhnə metodlarını işə salıblar. "Blokada"da olduqlarını, "humanitar böhran" yaşadıqlarını, "genosidə" məruz qaldıqlarını dünyaya car çəkib ölkəmizin əleyhinə təbliğata başlayıblar. Gündüzlər kameraların qarşısına keçib özlərini "yazıq" göstərir, gecələr "fransız valsı" oynayırlar...
Azərbaycan müstəqil dövlətdir. Ərazilərinə kimi haradan buraxacağını, sərhədlərində harada nəzarət-buraxılış məntəqəsi yaradacağını özü müəyyən edir. Bu mövzuda hər hansı bir dövlətin işimizə qarışmağa nə haqqı, nə də hüququ var. Əks tədqirdə bu, beynəlxalq hüququn pozulması, qanunlara hörmətsizlik deməkdir. Beynəlxalq aləmdə Azərbaycan ərazisi kimi təsdiq olunmuş və Ermənistanın da Azərbaycan ərazisi kimi tanıdığı Laçın rayonunda səhrəd nəzarət-buraxılış məntəqəsini yaratmaq ölkəmizin hüququdur. Bununla Azərbaycan öz suverenliyini tam bərpa etdi. Ölkəmizin həyata keçirdiyi bu tədbirlə ərazilərimizə gələn silahlı quldurların qarşısının alınmasına, Ermənistanın ərazilərimizə öldürücü silahların daşımasına, bir sözlə, qanunsuz əməllərinə, özbaşınalığına son qoyuldu. Bu, ölkəmizin milli təhlükəsizlik məsələsidir. Azərbaycanın bu haqq səsi Cənubi Qafqaz siyasətində uzun illər "vasitəçilik" missiyası yerinə yetirən, ermənilərə hər cür hərbi dəstək verib problemin həllinə mane olan, 44 günlük Vətən müharibəsi zamanı çoxillik fəaliyyəti iflasa uğrayıb ofsayta düşən Fransanın, onun erməni lobbisinin sözçüsünə çevrilmiş prezidenti Emmanuel Makronun xoşuna gəlmədi. "Bacılar" cütləşib əleyhimizə informasiya cəbhəsi açdılar. Təbii ki, olan əllərində alət etdikləri və illərdir ələbaxan duruma saldıqları Qarabağda yaşayan erməni əhalisinə oldu.
Fransızların sərhəddə sərgüzəştləri
BMT-nin Təhlükəsizlik Şurasında Azərbaycan əleyhinə qurduqları tamaşanın arzuladıqları finalla bitmədiyini və seytnot vəziyyətinə düşdüklərini görən "bacılar" oyunun yeni variantlarını düşündülər. İndi də Fransa Erməni Təşkilatları İttifaqının (CCAF) xahişi ilə Paris merinin Fransanın regional icmalarını Qarabağa "humanitar karvan" təşkil etməyə çağırışı ilə toplanmış 10 yük maşını "humanitar yardımın" Marsel, Strasburq merlərinin və digər region rəhbərlərinin müşayiəti ilə sərhədlərimizə cəmləşməsi təxribatdan başqa bir şey deyil. Məgər bunlar görmürlər ki, xeyli vaxtdır 44 günlük müharibə zamanı "humanitar yardım" aparmaq adı ilə Ermənistana silah keçirmək istəyən "Spayk"in 21 avtomobili Ermənistanın Gorus rayonu ərazisində, Azərbaycanla sərhəddə dayanıb gözləyir. Bu gün bu avtomobil karvanına Fransadan gəlmiş 10 yük avtomobili də əlavə olunsa, güya nə dəyişəcək ki? Axı Azərbaycan qətiyyətli mövqeyini göstərib.
Azərbaycan xoş məram nümayiş etdirir
Qarabağda yaşayan erməni əhalinin heç bir humanitar böhran keçirmədiyini, əslində, orada yaşayan əhalinin separatçıların, Ermənistanın hakimiyyət dairələrinin, eyni zamanda regionda marağı olan bəzi dövlətlərin əlində alətə çevrildiyini, beynəlxalq güclərin Cənubi Qafqaz uğrunda mübarizə apardıqlarını və bu mübarizədə "məzlum ermənilər"dən istifadə edildiyini bilməyən az siyasətçi tapılar.
Azərbaycan irihəcmli yükdaşımalar üçün Ağdam-Xankəndi yolunu təklif edib. Bu yol ölkəmizin təhlükəsizliyi üçün seçilmiş ən düzgün variantdır. Gələn yüklərin beynəlxalq gömrük qanunları ilə diaqnostika olunduqdan sonra ünvanına çatdırılmasına icazə veriləcək. Ermənilər və himayədarları isə yüklərin Laçın yolu ilə daşınmasında israr edirlər. Sual olunur: ac adama çörək lazımdırsa, onun hansı marşrutla gəlməsinin fərqi nədir? Xəstəyə dərman lazımdırsa, bu dərmanın Laçından və ya Ağdamdan keçərək Xankəndiyə çatdırılması xəstənin səhhətinə fərqli təsir etmirsə, nədən inad edilir? Bu məsələ ilə bağlı torpağın sahibinin yox, kənar qüvvələrin fikri niyə əsas götürülməlidir?
Qarabağ separatçıları və orada yaşayan ermənilər "real" humanitar böhran görüntüsü yaratmaq üçün indi də "çörək şousu" yaratmağa hazırlaşırlar. Artıq "çörək şousu"nun ssenarisi hazırdır. Tezliklə tamaşa göstərilməyə başlanılacaq. Separatçı rejimin rəhbərləri əhalinin əlində olan taxılı yığmaq üçün sakinlərə xəbərdarlıq da ediblər. Yəqin ki, yaxın günlərdə Fransa televiziyaları, eləcə də sosial şəbəkələrin erməni seqmentləri "çörəksizlikdən, aclıqdan üzülmüş" ermənilərin görünütlərini ekranlarda tirajlayacaqlar. "Yazıq", "məzlum" görsənmək, "başına gələn faciələr"dən gəlir götürmək, qazanmaq, erməninin xislətindədir. Bunu bildikləri, utanmadan oynamağı bacardıqları üçün də bu üsullardan istifadə edirlər.
Azərbaycan Qarabağda yaşayan erməni əhaliyə 40 ton un göndərib
Azərbaycan hərbi cinayətlərdə əli olmayan erməni əhalisinin Azərbaycana reinteqrasiyasını təklif edib. Qarabağda heç bir humanitar böhran yaşanmadığı və hətta humanitar böhranın əlamətləri olmadığı halda belə, Azərbaycan orada yaşayan erməni əhaliyə sovqat olaraq 40 ton un göndərib. Erməni əhalinin Laçın yolu ilə sərbəst, maneəsiz çıxışına və dönüşünə şərait yaradıb.
Amma erməni məkri, erməni hikkəsi yenə özünü göstərir. "Ac qaldığını", "humanitar böhran" yaşadığını iddia edən ermənilər Azərbaycana bu xoş niyyətinə görə təşəkkür etmək əvəzinə, yolu bağlayıb, küçələrə çıxıb etiraz edirlər. Azərbaycanın göndərdiyi unu qəbul etməyəcəklərini bildirirlər...
Ermənilərin təzyiq altında "dirəniş" göstərməsinə qəti şübhə yoxdur. Anlayırıq ki, hətta içərilərində kasıb yaşayan, yardıma ehtiyacı olan və yersiz siyasi dartışmalardan bezən ermənilər də az deyil. Hətta separatçıların bəzi "funksionerləri" Azərbaycanın reinterqasiya təkliflərini normal qarşılayır, Ağdamın Əsgərana yaxın ərazisində Azərbaycanın böyük ərzaq anbarlarının yaradılmasını təklif edirlər. Ağdam yolunda humanitar mərkəz yaradılacağı tədqirdə, ermənilərin ərzaq üçün bura müraciət edəcəkləri çox inandırıcı görünür. Biz yaxın keçmişdə Laçın-Xankəndi yolunda aksiya keçirilən zaman erməni icmasının nümayəndəsi Toros Qazaryanın kömək üçün azərbaycanlılara müraciət etməsinə də şahidlik etmişik.
Elşən QƏNİYEV,
"Azərbaycan"
