"Fransanın öz səfirini geri çağırması  bu ölkənin Azərbaycana qarşı qərəzli münasibətini bir daha sübuta yetirir. Ermənistanın silahlanmasını həyata keçirən, bölgədə militarizmi təşviq edən Fransanın bu addımları regionda vəziyyəti gərginləşdirməyə xidmət edir.  Gün kimi aydındır ki, Paris revanşistləri təşviq edən bu hərəkətləri ilə Azərbaycanla Ermənistan arasında sülh prosesinin formalaşmasına mane olmağa çalışır".
Bu fikirləri "Azərbaycan" qəzetinə açıqlamasında Milli Məclisin deputatı Cavanşir Paşazadə deyib. Deputat qeyd edib ki, Fransa elə 25 ilə yaxın vasitəçilik etdiyi müddətdə də ölkəmizə qarşı davamlı riyakarlıq nümayiş etdirib, işğalçının müdafiəsinə qalxıb: "Lakin 2020-ci il Vətən müharibəsində və 2023-cü il antiterror tədbirlərində Azərbaycan öz ərazi bütövlüyünü və suverenliyini tam bərpa etdikdən sonra Fransanın anti-Azərbaycan mövqeyi daha kəskin xarakter alıb. Xarici İşlər Nazirliyinin məsələ ilə bağlı yaydığı bəyanatda da qeyd olunduğu kimi, Fransanın BMT Təhlükəsizlik Şurasında, Avropa İttifaqı, Frankofoniya kimi təşkilatlarda və digər beynəlxalq platformalarda dəfələrlə Azərbaycan əleyhinə sənəd layihələrinin təşəbbüskarı olması bu ölkənin bitərəf vasitəçi iddialarının tamamilə əsassız olduğunu sübuta yetirib. Son vaxtlar Azərbaycanın Fransa müstəmləkəçiliyindən azad olmaq istəyən xalqlara dəstəyi, fransız casus şəbəkələrinin tərəfimizdən ifşa olunması bu ölkəni daha da aqressivləşdirib. Çünki Makron hakimiyyəti xüsusilə kiçik dövlətlərin onların sözü ilə oturub-durmasına öyrəşib".
Deputatın sözlərinə görə, səfirin geri çağırılması Fransanın Azərbaycanla münasibətləri korlamaq üçün atdığı addımlardan biridir: "Əzəldən münasibətlərin pozulmasına yönəlmiş bütün addımları atan Parisin indi "küskün" obraz yaratmaq cəhdləri gülüncdür. "Təhdid, təzyiq dili ilə danışmaq Fransaya heç nə qazandırmayacaq. Azərbaycan öz milli maraqlarının qorunması üçün bütün zəruri tədbirləri görəcəyini dəfələrlə bəyan edib. Riyakar və qərəzli dövlət və ya təsisatların Ermənistanı militarlaşdırmaq, revanşistləri həvəsləndirmək cəhdləri nəticə verməyəcək", - deyə Cavanşir Paşazadə vurğulayıb.

Nəzrin QAFARZADƏ,
"Azərbaycan"