Bir gündə daha iki etimadsızlıq səsverməsindən sonra Sebastyan Lekornünün hökuməti 2026-cı ilin dövlət büdcəsinin qəbul olunmasını təmin edə bilib. Bu, Fransanın dövlət büdcə kəsirini ÜDM-in 5 faizindən aşağı salmağa kömək etməlidir.
Baş nazir Sebastyan Lekornü sosial mediada yazıb: "Nəhayət, Fransanın büdcəsi var - aydın qərarları və əsas prioritetləri əks etdirən bir büdcə, dövlət xərclərini məhdudlaşdıran, ev təsərrüfatları və müəssisələr üçün vergi artımlarını nəzərdə tutmayan bir büdcə".
"Bütün fraksiyaların düzəlişlərini əhatə edən parlament kompromisinin nəticəsi" olan büdcənin Fransanın dövlət büdcə kəsirini ümumi daxili məhsulun (ÜDM) 5,4 faizindən 5 faizdən aşağı salacağı gözlənilir. AFP-nin məlumatına görə, S. Lekornünun ilkin planlaşdırdığı qənaət tədbirləri əvvəlcə elan ediləndən daha az radikal olub. Bundan əlavə, müdafiə büdcəsi 6,7 milyard avro artırılaraq 57,1 milyard avroya çatdırılacaq.
Milli büdcənin qəbul edilməsindən əvvəl hökumətə qarşı daha iki etimadsızlıq səsverməsi keçirilib. Bu dəfə o, parlamentdəki solçu düşərgə tərəfindən Milli Assambleyaya təqdim edilib və tələb olunan 289 səs əvəzinə 260 səs toplayıb. Marin Le Penin ifrat sağçı "Milli Birlik" partiyasından daxil olan ikinci oxşar təklif isə cəmi 135 səs alıb. Ümumiyyətlə, son həftələrdə hökumət büdcənin müəyyən hissələri ilə bağlı artıq dörd etimadsızlıq səsverməsinə məruz qalıb.
Hədəfinə çatsa belə, Fransa yenə də Aİ-nin 3 faizlik dövlət kəsiri hədəfindən xeyli geridə qalacaq. Bundan əlavə, AFP-nin qeyd etdiyi kimi, ölkənin dövlət borcu yeni büdcə ilə artmağa davam edəcək. Hökumət bunun 2025-ci ildə ÜDM-in təxminən 116 faizindən 2026-cı ildə təxminən 118 faizə yüksələcəyini gözləyir.
Xatırladaq ki, Fransa Prezidenti Emmanuel Makron 10 oktyabr 2025-ci ildə Sebastyan Lekornünü hökumət başçısı vəzifəsinə yenidən təyin edib. 4 ay ərzində Parisdəki parlament üzvləri büdcə ilə bağlı kompromisə nail olmağa çalışıblar. S.Lekornü vəzifəyə başladıqdan sonra verdiyi sözün əksinə gedərək Fransa Konstitusiyasının 49.3-cü maddəsini tətbiq etməyə məcbur olub. Bu maddə hökumətin sonrakı etimadsızlıq səsverməsindən "sağ çıxacağı" halda qanunvericiliyin qəbul edilməsinə imkan verir.
İki ildən az müddətdə Prezident E.Makron dörd baş nazirə büdcə kəsirini azaltmaq və dövlət maliyyəsini tarazlaşdırmaq vəzifəsini tapşırıb. Hazırda Avropa İttifaqında Yunanıstan və İtaliyadan sonra üçüncü ən böyük dövlət borcu olan ölkə Fransadır.
Rizvan CƏFƏROV,
"Azərbaycan"
19 (1)jpg_1771885865.jpg)
