“Euronews” telekanalı “Explore Azerbaijan” rubrikasının son bölümündə Azərbaycanın Naxçıvan bölgəsinin təbiət möcüzələrini araşdırıb.
AZƏRTAC xəbər verir ki, “Euronews” müxbiri Anka Ulea “Around Azerbaijan” silsiləsinin bir hissəsi olaraq bu dəfə Naxçıvan Muxtar Respublikasına səyahətə çıxıb. Jurnalist vurğulayır ki, əsas məqsədi özü və təbiətlə yenidən əlaqə qurması olub...
“Həftəsonu mənimlə Naxçıvana gəlin”, -deyə Anka təklif edir. O əlavə edir: “Gəlin bu gözəl bölgədə sağlamlıq və istirahət mədəniyyəti ilə tanış olaq”.
Süjetdə qeyd edildiyi kimi, Naxçıvan unikal bir yerdir. Məlumatda İran, Ermənistan və Türkiyə arasında yerləşən Azərbaycanın muxtar diyarının heyrətamiz dərəcədə müxtəlif mənzərələrə malik olduğu vurğulanır. Əzəmətli qaya formasiyaları və dağlar əsrlər boyu əfsanələrə və yerli folklora ilham verib. Lakin bu quraq torpağın səthinin altında təbii bir xəzinə gizlənir: bölgənin ən böyük sağlamlıq turizmi mərkəzi olan Duzdağ duz mağaraları.
“Mən yavaş-yavaş yeraltına, 110 metr dərinliyə enirəm”, deyə Anka həyəcanla deyir. “Temperatur nəzərəçarpacaq dərəcədə aşağı düşür. Burada sabit 18 dərəcə Selsi temperatur var və yayın istisindən qaçmaq üçün ideal yerdir. Mağaranın qoxusu dərhal hiss olunur: kəskin və duzlu. Heç vaxt duzun qoxusunun olduğunu düşünməmişdim”.
Sovet dövründə bu mağara mədən idi, indi isə sanatoriya və turistik məkandır. Süjetdə qeyd edildiyi kimi, dünyanın hər yerindən insanlar astma xəstəliyindən bronxitə qədər tənəffüs yolları problemlərini müalicə etmək üçün buraya gəlirlər.
“Duzdağ Terapiya Mərkəzi 1979-cu ildən bəri fəaliyyət göstərir”, -deyə sağlamlıq mərkəzinin baş tibb bacısı Nuranə Mirzəyeva deyir. Onun sözlərinə görə, labirinti təşkil edən tunellərin ümumi uzunluğu 46 kilometr, girişdən palatalara qədər isə 360 metrdir.
Bütün ziyarətçilər üçün turlar mövcud olsa da, çarpayılar göndərişli xəstələr üçün ayrılıb. Bu xəstələrin 70 faizindən çoxu uşaqlardır. Tibb bacısı vurğulayır: “İnsanlar adətən bizə tənəffüs yolları xəstəlikləri ilə gəlirlər. Buradakı havada 19-21 mq/m3 natrium xlorid ionları var. Bu, əla göstəricidir və bronxial astma kimi müalicəsi çətin olan xəstəliklərdən tam sağalmanı təmin edir”.
Daha sonra “Euronews” telekanalının müxbiri kitabxanaya baş çəkib və keçmiş pasiyentin birbaşa mağara divarlarına həkk etdiyi heyvan oymalarına heyran qalıb. Duzdağdan ayrılmazdan əvvəl Anka mağaranın çayxanasında çay içib və sanki səs-küylü dünyadan uzaq, sakit və dinc atmosferdə qısaca meditasiya edib.
Anka Ulea yerin altında daxili rahatlıq tapdıqdan sonra Naxçıvanın ən gözəl yerlərindən biri olan Batabat gölünün dağ zirvələrinə yollanıb. Batabat gölü dəniz səviyyəsindən 2500 metr yüksəklikdə, Şahbuz dağ bölgəsində yerləşir. Ankanın sözlərinə görə, bu ərazini hamıdan yaxşı tanıyan “Nakhchivan Travel” şirkətinin bələdçisi Səidə Musayeva ilə birlikdə göl sahilində gəzintiyə çıxıb. Səidə deyir: “Əslində, Batabat Naxçıvanın şimalında sıx meşələri olan mənzərəli Alp qismində vadidir. İnsanlar buraya piknik və gəzinti üçün gəlirlər, ona görə də bu dağların həmin məqsəd üçün ideal olduğunu demək olar. Bu məkanı turistlər daha çox sevirlər”.
Bələdçi Ankaya Batabatda məşhur olan gözəl mənzərələri - göldə sərbəst üzən adaları və ilboyu axan büllur kimi şəffaf buzlu suları olan Zorbulaq bulağını göstərir. Müxbir deyir: “Gölün ətrafında dərman bitkiləri və qida məqsədilə istifadə olunan bitkilər bitir. Yaz və yay aylarında onları bələdçi ilə götürə və ilboyu təzə balın da satıldığı açıq hava mağazalarında ala bilərsiniz”.
Batabat gölü yerli sakinlər arasında da məşhur piknik yeridir. Buna görə də qızlar qəlyanaltı almaq və öz pikniklərini təşkil etmək üçün yaxınlıqdakı bir kəndə yollanır. “Bu, ənənəvi Azərbaycan yeməyi olan qutabdır”, - deyə Səidə Ankaya baxaraq izah edir. O, göyərti, ispanaq və yaşıl soğanla bişirilən qutabı jurnalistə təklif edir. Daha sonra digərlərinə də işarə edir: “Bunlar nazik xəmirdən hazırlanır və tərkibində müxtəlif içliklər - göyərti, ət, pendir var”.
Ankanın sözlərinə görə, daha sonra əsl ziyafət qurulur: tərəvəz və ət qutabı, təndirdən çıxmış təzə çörək, turşuya qoyulmuş tərəvəzlər, qoz-fındıq və soğan piroqları. Bütün bunlar Naxçıvan ləzzətləridir... Ankanın vurğuladığı kimi, heç bir Azərbaycan ziyafəti isti çay olmadan tamamlanmış sayıla bilməz...
“Naxçıvanda səyahət etmək sözün əsl mənasında təmiz hava ilə nəfəs almaq kimidir”, - deyə Anka Ulea heyranlıq və həvəslə süjeti yekunlaşdırır. O əlavə edir: “Bu dağların zirvələrindən Duzdağ duz mağaralarının dərinliklərinə qədər bütün məkanlara etdiyiniz səyahət öz köklərinə qayıdış, insan üçün artıq olan hər şeydən təmizlənmiş həyatdan zövq almaq üçün əla bir fürsətdir”.
