Əsas kapitala 13 milyard manat investisiya yönəldilib  

Cari ilin yanvar-sentyabr aylarında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 13 milyard 048,1 milyon manat və ya 2024-cü ilin müvafiq dövrü ilə müqayisədə 1 faiz çox investisiya yönəldilib.

Dövlət Statistika Komitəsindən AZƏRTAC-a bildirilib ki, neft-qaz sektoruna yönəldilmiş investisiyaların həcmi 11,5 faiz azalıb, qeyri neft-qaz sektoruna yönəldilmiş investisiyaların həcmi isə 7 faiz artıb. Ümumi sərmayənin 6 milyard 647,6 milyon manatı və ya 51 faizi məhsul istehsalı sahələrinin, 4 milyard 298,5 milyon manatı (32,9 faizi) xidmət sahələrinin, 2 milyard 102 milyon manatı (16,1 faizi) isə yaşayış evlərinin tikintisinin payına düşüb.

Ümumi sərmayənin 51,6 faizi dövlət, 48,4 faizi qeyri-dövlət sektorunun sərmayədarları tərəfindən qoyulub. Sərmayə qoyuluşunun 78,8 faizi tikinti-quraşdırma işlərinə sərf edilib. Daxili mənbələrdən əsas kapitala yönəldilmiş investisiyanın dəyəri ümumi sərmayənin 77,1 faizini təşkil edib.

Bu ilin yanvar-sentyabr aylarında əsas kapitala yönəldilmiş ümumi investisiyanın 40,9 faizi sənaye, 24,5 faizi tikinti, 22,1 faizi nəqliyyat və anbar təsərrüfatı, 2,2 faizi turistlərin yerləşdirilməsi və ictimai iaşə, 1,8 faizi informasiya və rabitə, 1,7 faizi təhsil, 1,6 faizi kənd təsərrüfatı, meşə təsərrüfatı və balıqçılıq, 1,3 faizi maliyyə və sığorta, 1,2 faizi istirahət, əyləncə və incəsənət sahəsində fəaliyyət, 1 faizi dövlət idarəetməsi və müdafiə; sosial təminat, 0,8 faizi ticarət; nəqliyyat vasitələrinin təmiri, 0,5 faizi əhaliyə səhiyyə və sosial xidmətlərin göstərilməsi, 0,3 faizi inzibati və yardımçı xidmətlərin göstərilməsi, 0,1 faizi peşə, elmi və texniki fəaliyyət sahələrinə sərf edilib.

2025-ci ilin yanvar-sentyabr aylarında neft-qaz sektoruna 3 milyard 671,6 milyon manatlıq investisiya yönəldilib. Qeyri neft-qaz sektorunun inkişafına sərf edilmiş 9 milyard 376,5 milyon manatlıq investisiyanın 1 milyard 669,6 milyon manatı (ümumi sərmayənin 12,8 faizi) qeyri neft-qaz sənayesi sektorunda istifadə edilib.

2025-ci ilin yanvar-sentyabr aylarında Bakı şəhərində Dövlət Gömrük Komitəsinin yeni inzibati binası, qəlyanaltı məhsullarının istehsalı zavodu, Özbəkistan səfirliyinin yeni binası, Səməd Vurğun adına Yaradıcılıq Evi, Gəncə şəhərində Gəncə Avtoparkı, Gəncə Memorial Kompleksi, Gəncə Stadionu, Mingəçevir şəhərində “8 Noyabr” Elektrik Stansiyası, Xankəndi şəhərində “Xankəndi” Biznes Mərkəzi, Xankəndi Konqres Mərkəzi, Qarabağ Universitetinin Klinikasının binasının, Tibb və sağlamlıq elmləri fakültəsinin tədris korpusu, Sumqayıt şəhərində tikinti kimyəvilərinin istehsalı zavodu, yük və xüsusi təyinatlı avtomobil istehsalı zavodu, Ağdam rayonunda Regional Rəqəmsal İdarəetmə Mərkəzi və Təlim-Tədris Kompleksi, tütün məmulatlarının istehsalı müəssisəsi, Sarıcalı kəndinin birinci mərhələsi, Kəngərli kəndinin birinci mərhələsi, Xıdırlı kəndinin 1-ci mərhələsi, Kəngərli kənd tam orta məktəbi, Kəngərli kənd körpələr evi-uşaq bağçası, 1 nömrəli tam orta məktəb, 1 nömrəli körpələr evi-uşaq bağçası, Dəmir Yolu və Avtovağzal Kompleksi, Ağdam Muğam Mərkəzi, Ağdərə rayonunda məscid, Füzuli rayonunda Əhmədbəyli-Füzuli-Şuşa yolu, Goranboy rayonunda tikinti materialları istehsalı müəssisəsi, Xocalı rayonunda “Xocalı” yarımstansiyası və Rəqəmsal İdarəetmə Mərkəzi, heyvandarlıq kompleksi, kərpic zavodu, Xocavənd rayonunda məscid, İsmayıllı rayonunda “Talıstan” liseyi, “Coca-cola” istehsalı müəssisəsi, Kəlbəcər rayonunda “Aşağı Vəng”, “Nadirxanlı” və “Çaykənd” kiçik su elektrik stansiyaları, Laçın rayonunda tikiş fabriki, ayaqqabı fabriki, “Aşağı Malıbəy” və “Mirik” su elektrik stansiyaları, İstirahət Kompleksi, Rəqəmsal İdarəetmə Mərkəzi, Beynəlxalq Hava Limanı, Şuşa rayonunda Daşaltı kənd məscidi, Şuşa Müalicə-Sağlamlıq Mərkəzi, Yevlax rayonunda 110/35/10 kV-luq “Yevlax” qovşaq yarımstansiyası, Regional Təlim-Tədris və Laboratoriya Mərkəzi, Mərkəzi Aran Regional SCADA İdarəetmə Mərkəzi, pilot aqroparkı, Olimpiya İdman Kompleksi və s. mühüm əhəmiyyətli obyektlər istifadəyə verilib.

Xarici ölkələr və beynəlxalq təşkilatların vəsaitləri hesabına əsas kapitala yönəldilmiş investisiyanın 2 milyard 913 milyon manatı (97,4 faizi) Böyük Britaniya və Şimali İrlandiya Birləşmiş Krallığı, Birləşmiş Ərəb Əmirlikləri, Türkiyə, Rusiya Federasiyası, Amerika Birləşmiş Ştatları, İsveçrə, Yaponiya, İran İslam Respublikası, Macarıstan, Fransa və Hindistan sərmayədarlarına məxsus olub.

2025-ci ilin yanvar-sentyabr aylarında tikinti müəssisələri tərəfindən (fərdi sahibkarlar nəzərə alınmaqla) yerinə yetirilmiş inşaat işlərinin 83 faizini inşa, yenidənqurma və bərpa, 7,9 faizini əsaslı təmir, 5,7 faizini cari təmir, 3,4 faizini isə sair tikinti işləri təşkil edib. Ümumi inşaat işlərinin 89,3 faizini qeyri-dövlət mülkiyyətində olan tikinti müəssisələri yerinə yetiriblər.